١٠ افلام دراما عن مرضي نفسيين ..
ف يوم من الأيام لما كنا نسمع عن حد مريض نفسي او بيروح لدكتور نفسي كنا بنقول ده مجنون ، وف بعض الأحيان كنا بنتجنبه كمان ، كنا بنعتبره شخص مش سوي مينفعش نختلط بيه .. لكن دلوقت الزمن اتغير والواقع بقي قاسي علي الكل فبقي المرض النفسي اسلوب حياة وموجود عند اغلب الأجيال الجديدة ومن ناحية تانية موضة بيتمسح البعض فيها عشان يكتسبوا قيمة ميستحقوهاش
المرض النفسي يعتبر من الأسرار اللي محدش بيحب يعترف بيها ف حياته أو يقول إنه خاضها إلا ف حدود ضيقة خصوصا الأمراض اللي فيها إيذاء للنفس أو للغير أو احتاجت نخش مصحات أو جلسات مستمرة مع دكاترة ، وخصوصا كمان الأمراض اللي نتجت بسبب عنف أسري أو صدمات نفسية أو حوادث تحرش وإغتصاب
دي قايمة من عشر افلام عن مرضي نفسيين سواء ف قالب درامي أو غامض أو كوميدي ، منهم ناس مروا بتجربة العلاج وناس مكنوش يعرفوا اصلا أنهم مرضي ..
اول ضغط نفسي بيمر بيه الإنسان ف حياته هو الضغط اللي جاي من الأهل خصوصا لو بيلغوا تفكيرك وبيحولوك لعروسة ماريونيت بيوجهوها حسب ما هما عايزين ودي كانت البذرة اللي كبرت عليها شخصية نينا راقصة الباليه المشهورة .
لكن ف سبيل الكمال وبسبب تعلقك بشيء عاوزه بشدة سواء شخص أو شيء معنوي ممكن تناقض شخصيتك وتقدم تنازلات عشان خاطر توصل ، تنازلات هترفضها بالاول لكن بالوقت هتبقي عادي عندك .
القصة عن مخرج بيحضر لعرض مسرحي عن بحيرة البجع لكن بمعالجة بيبرز فيها البجعة السوداء ، الجزء الأعمق ف شخصية البجعة ، بيعمل تجارب لراقصات باليه عشان يختار منهم بطلة العرض وبيفاضل بين اتنين ف النهاية بينهم نينا “ ناتالي بورتمان ” .. لكن نينا شخصية عايشة ف ضل امها ، بنت رقيقة وهادية ، شخصية خاوية ، مجرد بنت شاطرة ف رقص الباليه لكن لأن الرقص شغفها الأول ولأنها حست أن الدور هيضيع منها ولأنها قدمت شخصية البجعة السوداء ف البروفات من غير احساس بعمق الشخصية بيقرر المخرج تبديلها
الفيلم بيظهر الهلاوس اللي بتتعرضلها والإضطرابات والصراعات الداخلية وبداية التمرد ع النفس ف سبيل الوصول لغايتها ، الوصول الكمال .
ناتالي بورتمان فازت بأوسكار عن دورها
2 - One flew over the cuckoo’s nest ( 1975 )
المشاهد السطحي لما هيتحط ادامه فيلم زي ده هيشوفه فيلم قديم عن مستشفي “ مجانين ” .. لكن الحقيقة الفيلم ده ملحمة وساعات هتحس أنه مليان إسقاطات ع الواقع .
الفيلم حبكته الأساسية عن متهم ف قضايا إغتصاب بيتدعي الجنون عشان يتحط ف مصحة امراض نفسية بدل السجن لكن الحقيقة بيكتشف أنه دخل سجن اكبر وبيجاهد عشان ينول حريته من تاني . الفيلم هنا مش معركة بين الخير والشر لكن معركة بين الحرية والقمع ، السجين والسجان ، بين جاك نيكلسون والممرضة الديكتاتورية اللي بتمنع كل وسائل البهجة علي المرض والحياة داخل المصحة ما هي إلا روتين وعلاج قاسي بالكهربا بل والعقاب نفسه بالكهربا .
المرضي نفسهم منهم اللي بيعاني من إضطرابات عقلية أو عصبية وهتحس انك جوة الأحداث بل وهتخاف يبقي مصيرك زيهم لما تشوف شخصية جاك نيكلسون العاقل اللي كان عاوز يدخل الحياة ف قلوب المرضي لكن واحدة واحدة بيلاقي نفسه بقي شبههم ، مسجون ف سلطة الممرضة الديكتاتورية
الفيلم فاز ب ٥ اوسكار ، منهم واحد لجاك ومنهم للممثلة اللي عملت دور الممرضة
3 - Silver linings playbook ( 2012 )
لما تحب توضح لحد يعني ايه مرض نفسي بطريقة بسيطة وخفيفة ممكن ترشحله الفيلم ده ، بعدها هيبدأ يفهم أن المرض النفسي مش جنون وف نفس الوقت مش هيستقل بيه
قصة الفيلم عن مدرس خرج من المصحة بعد ماقضي فيها فترة طويلة بسبب صدمة اثر خيانة مراته له ، بيخرج بشرط يفضل ياخد علاجه علي امل يرجع طبيعي زي الأول وبعد بخروجه بفترة بيتعرف علي تيفاني “ جينيفر لورانس ” اللي بدورها لسه خارجة من صدمة وفاة زوجها ويمكن اول دردشة بين الاتنين كانت عن انواع المهدءات والأدوية اللي كانوا بياخدوها أثناء ازمتهم
الفيلم هيقربك من نوبات الإضطراب ثنائي القطب وحالات تقلب المزاج الشديد بطريقة بسيطة متحسسكش انك ف محاضرة بل بالعكس الموضوع متوظف كويس جدا ف دراما رومانسية بين الإتنين هتخليك تحب الفيلم وتحب تشوفه تاني ، يمكن ده من اكتر الأفلام الرومانسية اللي بحبها لأنه مكنش عن الاتنين بس ، عن العيلة والصحاب ، الدايرة اللي بنكون جواها لحد ما نموت .
جينيفر لورانس خدت اوسكار عن دورها
4 - A beautiful Mind ( 2001 )
قصة حقيقية عن عالم الرياضيات جون ناش واللي كان بيعاني من الفصام ، تخيل ناس ملهمش وجود بل وبيعتبرهم صحابه وإيهام نفسه أنه الجندي المجهول اللي هينقذ امريكا من الروس
الجميل في الفيلم العلاقة بينه وبين زوجته اللي مهربتش بعد ماعرفت الحقيقة ، بل بالعكس هي اللي فضلت جنبه وساعدته لحد ما خد اكبر جايزة ف مجال الرياضيات لأن مرضه مكانش مساعده ف شغله وبيضعف قدرته علي التفكير والإبداع ، يمكن لو جون ناش كان البطل بسبب عبقريته وبسبب مرضه ، فزوجته كانت البطلة بسبب أصالتها وإخلاصها وصبرها ، يمكن هي المثال اللي اي راجل بيدور عليه لأن لو كل الدنيا علينا فهتفضل اللي زيها السند والضهر والحيطة اللي بنستخبي وراها
الفيلم فاز بأوسكار افضل فيلم وافضل ممثلة مساعدة “ جينيفر كونلي ” الزوجة ، وجوايز تانية
5 - The Machinist ( 2004 )
تريفيور “ كريستيان بيل ” عامل بيعاني من الأرق من حوالي سنة تقريبا بسبب حادث بيحاول يفتكره وبسبب الأرق صحته بتتأثر وبيتوهم ببشر ملهمش وجود مع بعض الهلاوس وبسبب حالته وإحساسه بالمؤامرة بيقطع ايد حد من زمايله ف المصنع
الفيلم عن عقدة الذنب وقدرتها علي تحطيم حياة إنسان لدرجة أنه يكون شبه الهيكل العظمي من قلة النوم ، الفيلم سوداوي ومخدش شهرة كافية اعتقد بس ده واحد من الأفلام اللي كريستيان بيل غير فيها شكل جسمه عشان دوره ، نزل من وزنه هنا ٢٦ كيلو عشان يكون متقمص الدور كويس ، اكله كان عن عبارة علبة تونة وتفاحة لمدة أربع شهور
6 - Revolutionary Road ( 2008 )
زواج الواقع بالخيال أو الروتين بالتمرد مبينتجش عنه غير الخوف والفشل ، خصوصا لما يكون الخيال والتمرد متجسدين ف صورة المرأة مش الراجل ، وده فيلم عن دور العلاقات في صناعة الأمراض النفسية
قصة الفيلم عن موظف بيتجوز ممثلة مسرح عن حب ، بتمشي الحياة عادي لحد مابتقترح الزوجة أنهم يعيشوا ف باريس بروح جديدة وحياة جديدة يحققوا فيها احلامهم ويعتزل الزوج وظيفته ويعتزلوا الروتين ، ينقذوا زواجهم من الرتابة والملل
بعد جدال طويل بيوافق الزوج وبيتحمس للفكرة ، الفكرة اللي اتكتب فيها ملايين الاغاني والقصايد ، انك تاخد حبيبك وتهربوا من زيف العالم لعالم احلامكم لكن ترقية الزوج ف شغله وزيادة مرتبه بتخليه يعيد حساباته ويرفض الفكرة وميسافروش ، فبتبدأ هنا المعركة بين البحث عن الإستقرار والبحث عن الحرية ، بتتوتر علاقة الزوجين لأبعد حد وبتتدهور نفسية الزوجة بالتحديد ، عشان كان نفسها ف واقع جديد ، روح جديدة وشغف جديد ، خصوصا أن شغفها الشديد بالفكرة اتحول لحالة ثورة داخلية ضد زوجها لحد ما بينتهي الفيلم بنهاية مأساوية .
أعمق فيلم ف الليست ومش كل الناس هتقدر تستوعبه أو تحبه ولكن يقال انه أفضل الأفلام الأوروبية .
الفيلم بيتكلم عن ممثلة مسرح بتقرر تصمت بإرادتها للأبد نتيجة وحشية وزيف العالم ، بتدخل لمشفي يساعدها ع الكلام وبترعاها ممرضة ف بيت بيطل علي البحر وعلي النقيض الممرضة مبتبطلش كلام وحكايات طول الفيلم ، عن خطيبها وعن نزواتها علي امل التانية تستجيب وتشارك ، لكن طول الفيلم حد بيحكي وحد بيسمع ف بيت بعيد عن كل البشر ، الفيلم فلسفي واعمق من فكرة اتنين بيتكلموا ومن اكتر الأفلام اللي نزل عنها مقالات وتحليلات ، خليط بين السينما وعلم النفس والفلسفة ، انصحكم بيه لو بتدوروا ع القصة مش ع التسلية
8 - Good Will Hunting ( 1997 )
قصة عن شاب مضطرب نفسيا بسبب طفولة قاسية نتيجة عنف منزلي ، بتشاء الظروف أنه يكون عبقري في الرياضيات لكن المؤسف أنه بيعيش ف وضع بائس وسط حي فقير وبيشتغل عامل نظافة ف معهد ماسوتشوستس لحد ما بيكتشف موهبته بروفيسور ف المعهد ده ، قصة عن شاب فاقد لهويته وميعرفش هو عايز ايه ف حياته بسبب الخوف وسيطرة الماضي علي عقله الباطن .
الفيلم بيظهرلك الإنسان ف الحالة دي لما بيتحب بيتصرف ازاي ، بيعامل حبيبته دي ازاي ، هيقدر يحبها بكل طاقته وبدون خوف ولا ، هيكون عنده الثقة أنه يكمل ؟ .. بيظهرلك أما الانسان ده تجيله فرصة يخش التاريخ من أوسع ابوابه بسبب عبقريته هيستغل الفرصة ولا هيرفضها ، انسان زي ده لما يتحط ادام دكاترة نفسيين عشان يعالجوه ويقيموا حالته هيساعدهم ولا هيكابر إقتناعا بأنه مش محتاج علاج ، الإنسان ده هيكون ايه دور صديقه المقرب وهو بيشوف صديقه بيعاند نفسه والناس ، بيعاند مستقبله .
الفيلم نفسي من الأفلام اللي بتجمع بين كزا خط ، وخط الرومانسية فيه للناس اللي بتحب قصص الحب المخلوطة بالألم النفسي هيتحب جدا ، واخيرا فيلم فيه روبن وليامز كدكتور نفسي ده لوحده قصة تانية
الفيلم فاز بكزا اوسكار منهم افضل ممثل مساعد لروبن وليامز ، افضل سيناريو اصلي “ مات ديمون / بن افليك ” .. هما اللي كتبوا القصة وده اول دور ليهم
9 - What’s Eating Gilbert Grape ( 1993 )
بداية مشوار ليوناردو دي كابريو مع جوايز الأوسكار ، اول فيلم يترشح عنه للأوسكار في سن ال ١٩ ، وده من اوائل الأفلام اللي شوفتها ف حياتي عموما ، اول مرة شوفته كان من ١٥ سنة علي الأقل فهو من الأفلام العزيزة لاني شوفته بنفس بريئة وكنت لسه نضيف وقتها .
الفيلم عن جيلبرت الاخ الاكبر اللي بيرعي اخوه الصغير وعيلته بعد انتحار أبوه بسبب عدم قدرته علي رعاية أولاده ، بجانب الأم اللي بتعاني من سمنة مفرطة خلتها مخرجتش من بيتها من ٧ سنين ، وبين الإلتزامات اللي بتقيد حركة جيلبرت وحريته بيقابل بالصدفة بنت بتعطل عربيتها ف مدينته . بيتعلقوا ببعض بعد فترة وده بيخليه يهمل أخوه المريض اللي بيحتاج رعاية خاصة ، وبين جمال التعلق وسوء القيود جيلبرت بياخد موقف مع الحب .
انا بحب الافلام اللي بتتضمن فكرة العيلة لأسباب شخصية ، فكرة البطل اللي ماشي ف مسار ما وتأثير المسار ده علي الأهل سواء بالإيجاب أو بالسلم ، يمكن ده بيفكرني بالمجتمعات الشرقية اكتر ، العيلة ثم احلامك
يمكن ده من الأفلام اللي هتحتاج انك تشوفه اكتر من مرة عشان تفهم قصته لكن مش هتحس بملل معاه .
الفيلم عن استاذ جامعي حياته روتينية ومملة مفهاش شيء مبهج ، بيقترح عليه زميله ف الشغل يشوف فيلم وبعد تأجيل لفكرة مشاهدة فيلم كزا مرة بيقرر يبدأ يشوفه ف ليلة كان في توتر ف علاقته بزوجته لكن بيلاقي أن في ممثل ف الفيلم شبهه بالظبط ف الشكل وف الصوت وف كل حاجة فبيبدأ رحلته ف البحث عن الممثل ده ومعرفة شخصيته عاملة ازاي .
الفيلم بيغلب علي الصورة بتاعته اللون الأصفر المطفي ، درجة اللون دي هتحسسك انك ف متاهة أو مسجون ، معرفش ليه ، بس هتدخلك وسط موود الفيلم بسرعة ، مش هتفهم الفيلم من اول مرة بسبب عمق التفاصيل جواه لكن هتحبه .
بكدة اكون خلصت ، اتمني تكون الليست عجبتكم ، اللي عجبه الموضوع لايك وريبلوج عشان يوصل لناس اكتر واقدر اعمل ليستات اكتر وتقدروا تشوفوا الليستات اللي فاتت من الهاشتاج
turnnoffyourmind
titsay
discoholicmusic
yousharknotpass
blakekathryn
baratheonpilled
areudirty
