سنة ٢٠٢٥ ما كانتش مجرد رقم اتشال من على الرزنامة، دي كانت سنة اتشالت من عمرنا حتت، سنة عدّت علينا وهي بتعلّم علينا واحدة واحدة، من غير صوت عالي، من غير إنذار .. وجع هادي، بس عنيد.
كانت سنة بتفككك ببطء، تبدأ معاك بحاجة بسيطة .. قلة نوم، تفكير زيادة، قلق مالوش سبب واضح، وبعدين تلاقي نفسك تعبان ومش عارف من إيه بالظبط.
٢٠٢٥ كانت سنة التفاصيل الصغيرة اللي وجعت أكتر من الضربات الكبيرة في كلمة اتقالت في وقت غلط، سُكوت كان المفروض يتكسر، حد كنت مستنيه يسأل وما سألش، حاجات شكلها عادي .. بس كسرت من جوه.
في السنة دي إتعلمنا إن الحياة مش دايمًا بتخبطك في وشك، أوقات بتمشي جنبك وتسرق منك حتة وانت مش واخد بالك .. سرقت الحماس، وسرقت الثقة، وسرقت الإحساس بالأمان .. آه والله زي مابقولك كده .. بس ضحكنا! ايوه ضحكنا، بس ضحك من النوع اللي بيخلص فجأة
ويسيب فراغ بعدها .. كنا بنضحك عشان نكمّل، مش عشان مبسوطين.
٢٠٢٥ كانت سنة الوحدة المقنّعة .. الناس حواليك، الكلام شغال، والقعدات مليانة .. بس إنت لوحدك في دماغك، بتحارب أفكار ما ينفعش تتحكي، سنة علّمتنا إن القوة مش إنك ما تقعش، القوة إنك تقع وتقوم من غير ما حد يلاحظ، وإن الصبر مش دايمًا اختيار، أحيانًا بيبقى فرض.
في ٢٠٢٥ قلوب اتقلّت، وأحلام اتأجلت، وناس انسحبت بهدوء من غير وداع يليق بكل اللي كان، ومع كل ده .. كُنا بنصحى، وده لوحده كان إنجاز .. صحى نشتغل، نضحك، نقول “ماشي الحال”، وإحنا شايلين جبل جوه الصدر.
والنهارده دخلنا ٢٠٢٦ مش منتصرين، ولا متفائلين زيادة عن اللزوم، دخلنا وإحنا متأملين بس. متأملين إن اللي فات ما يكررش نفسه بنفس القسوة.
يا رب .. إحنا مش طالبين حياة مثالية، ولا أيام كلها نور .. إحنا طالبين تعويض حقيقي، تعويض يحسّسنا إن التعب ما راحش هدر، تعويض عن ليالي طولت، وعن دعاء اتقال بصوت واطي عشان ما ينهارش اللي حوالينا، تعويض عن قلوب فضلت طيبة رغم إنها اتدهست.
يا رب .. خلّي ٢٠٢٦ سنة أهدى، سنة نعرف نرتاح فيها من غير ذنب، ونفرح من غير ما نستنى حاجة تقع بعدها، سنة نرجع نصدق إن الخير ممكن ييجي عادي .. من غير وجع قبله .. ولو كانت ٢٠٢٥ كشفتلنا معدن الناس، فخلّي ٢٠٢٦
ترجعّلنا نفسنا، لأن إحنا تعِبنا .. بس لسه واقفين، وده معناه إن الجاي لازم يكون أحن.
2087
kaledo-art
areudirty
ellievsbear
