ME - VS - ME

الانسان بعد ال ٣٠ مالوش غير جوازته ومراته وعياله .. مهما كان حواليك أهل وأصحاب وقرايب .. هترجع وحيد لو ممعكش زوجة وأولاد ... يالا الحمد لله

الواحد لازم ميشتكيش لأى حد والله لا قريب ولا غريب ولا عدو ولا صاحب .

اللى موجود مش راضيك واللى إنت عاوزه غالى عليك

ما بقتش فارقة فكرة إن يحصل اللى عاوزة أد فكرة إنه دايم وباقى ولينا ونصيبنا لحد منموت.

نفس شعور الوحدة واليتم الدائمين .. نفس شعور إن ناقصك حاجة .. بقيت متأكد إن روحى ونفسيتى هما اللى وحشين .. وإن العيب مش فى الناس اللى مروا عليا فى حياتى .. أنا اللى شخصية مجنونة وأنانية وشرانية .. وأكيد كل محاولاتى فى عيشة وونس وحياة راضية مش هيتحقق .

كان لازم يكون فيه خيار للإنسان إنه ولو لمرة يرجع لماضيه ويلغى ولو حاجة واحدة بس من حياته .

الواحد بس بتصعب عليه نفسه

أنا نفسى أروح اسكندرية .

٣ سنين عدى عليا ناس كتير أوى فيهم .. ٣ سنين علاقات منجحش فيهم غير الصداقة الصافية اللى ما فيهاش أى تبادل منفعة مشترك غير الحكى .. رغم كدا برضو الحكاية مكملتش بسبب انسحابى أو انسحاب الناس لأسباب مختلفة بس الأهم إننا كأشخاص ما كناش سببها خالص .. ويمكن دى العلاقات اللى مفرحانى .. الناس دى حقيقى وحشونى .. أغلب اللى مروا فى حياتى بيوحشونى .. بس دول بيوحشونى أكتر حقيقى 🤍

وإنت بتمشى ليه ؟ عشان فى يوم مرضتش أمشى فهما مشيو وسابونى ومن يومها بخاف أستنى حد ليمشى ويسيبنى تان.

الواحد عامل زى السكران من كتر التخبيط وسرعة الأحداث .. نايم زى اللى رافع مخدرات وخلاص نام وتعب على الارض .. لا حول له ولا قوة .. مش محتاج كلام خلاص ولا حكم ولا مواعظ ولا أى تصبيرات دينية أو فلسفية حتى .. الواحد محتاج حد يمدله إيده ويساعده ويطبطب عليه ويحضنه ويبص فى عينه من غير ولا كلمة.

والله يا جماعة فى ناس هنا كتير بجد مكلمتهمش ولا مرة وبجد ربنا أعلم إنهم بقوا جزء من حياتى .. وبحب اشوف وصلوا لايه فى مشاكلهم وحياتهم وكل اللى بيشتكو منه هنا .. عندى صورة مصغرة لكل حد بحبه هنا وكأنه حد من أهلى .. وزعلان بجد على ناس هنا كانو بنفس المعزة بس خدو قرار بإنهم يمشوا من هنا وبجد بيبقى نفسى بس أوصلهم وأطمن إنهم بخير وإنهم نجوا من الصعوبات اللى كانوا بيشتكوا منها.

أنا بحب فيلم المشبوه أوى .. بحب كل حاجه فيه .. موسيقته .. تصويرة .. قصته .. بغيب أغيب وأرجع أتفرج عليه زى أول مرة اتفرجت عليه .. بحب شرح الموسيقى بتاعته اللى شرحها هانى شنودة .. يمكن بحسها تشبه لحياتى .. حب وتنطيط ومواقف معقدة .. أذية وخيانات من أقرب الناس اللى حبيتهم .. ظروف بتدفعك إنك تعيش عيشة مش على طبيعتك .. بحب كل كادراته كلهم أحلى من بعض .. بحب سعاد وهى بتولعله السيجارة وهو نايم نص نومة على السرير وبيفكر .. وبحبها وهما فى وسط النيل وهو بيقولها وأنا بختى حلو أوى كدا ؟ .. جميل قصة إن الحب يبتدى باتنين مشتتين ضايعين مش عارفين هما رايحين فين ونفسهم حياتهم تتغير من كل شتات وضلال هما فيه والحب يغيرهم ويخليهم يتوبو ... سعاد هتفضل أجمل واحده فى السينما كلها .. حقيقى فيلمى المفضل فى السينما المصرية كلها 🤍