Don't follow me

Sep 16

جون مات النهارده، الحزن اللي جوايا اتنين واحد علشان ذكرياتنا سوا واد ايه انا كنت بحبه وكمية الحاجات اللي عملناها سوا ده زمن كبير وذكريات مقدرش اعدها على ايدي، والتاني علشان حزين على اد ايه انا طلعت شخص قذر حقير أناني مابيفكرش غير في نفسه

بيخليني أفكر اد ايه انا مش صاحب كويس أنا مينفعش أكون صاحب حد اصلا

كل ماتحس بخطر او بملل او بزهق بتهرب وبتختفي ومش مهم الشخص التاني اللي قدامك مش مهم هو اد ايه اتعذب او اتفشخ او حس انه لوحده

انت ازاي فاكر انك صاحب كويس ازاي جيه في دماغك ان صحابك بيعتبروك صاحب كويس

وكمان بتستغرب لما حد بيشتكي منك انت مش ملاك خالص يا احمد انت شخص اناني فعلا مبتحبش غير نفسك ومش عاوز توجع دماغك. كنت متضايق ان اخوك بيقولك متوجعليش دماغي ماهو زيك زيه انتوا الاتنين نفس الدماغ المتخلفة

May 25

جدتي اتوفت ادعولها.

بصراحة انا مش عارف اقول ايه ذكرياتي معاها كلها حلوة وفيها دفئ وطمأنينة وشقاوة كمان كانت شقية أوي كنا بنتفرج سوا على العيال كبرت كتير وكانت دايما بتفكرني انها كريمة مختار في نفسها أوي. وانا في الدفنة النهارده مكانش في حاجة في دماغي غير أغنية كانت بتغنيهالي زمان وبتقولي انها اغنية فرنساوي مع انها كانت بتغني انجليزي اصلا او يمكن انا اختلط عليا الذكريات بس كلمات الاغنية ديه حلوة وبسيطة اوي غالبا كانوا بيعلموهالها في المدرسة زمان وهي صغيرة. كلماتها بتبدأ بتقول: there was a lady sweet and kind.... وبعدين قصيدة مدح جميلة وكيوت أوي للسيدة ديه وآخر الأغنية بتقول and I'll love her till I die أنا حقيقي هفضل أحب الست ديه لحد ماموت متهيألي هي أكتر حد بحبه في عيلتي.

تيتا كان جالها جلطة من سنة ونص تقريبا وده أثر على نطقها ودرجة استيعابها بس دايما كان لما بشوفها كانت بتحاول تتكلم معايا وده اللي مخليني مقتنع ان انا وهي فيه علاقة مميزة بتربطنا ببعض خلتها مرة تغنيهالي الاغنية ديه وهي عيانة كده وده كان يعتبر انجاز عمرها ماعملت حاجة زي ديه من ساعة ماتعبت.

تيتا ماتت بسبب ان جالها سخونية وزورها ملتهب الاسبوع اللي فات ويمكن يكون في أعراض تانية بس مقدرناش نعرف علشان هي مش بتتكلم وبصراحة أنا بحاول أوي أقول لنفسي ان ديه مش كورونا وان هي ماتت لأن هي كده كده كانت تعبانة اصلا بس مش قادر برده مفكرش في حاجة زي كده.

ماما وخالتي وجوز خالتي عيانين من ساعتها على ايام مختلفة وبرده كانوا مصممين يحضروا الدفنة ويعملوا الحاجات اللي شايفين انها المفروض تتعمل لما حد يموت، طبعا انا مقدر موقفهم وهم كمان كانوا لابسين ماسكات وناس كتير كمان وقتها كانوا لابسين ماسكات وواخدين بالهم اوي. بس حقيقي حاجات زي ديه بتخليني أسأل نفسي امتى نقدر نتخلى عن شوية عادات وتقاليد ممكن تكون مالهاش لازمة لما يكون عملها ده ممكن يودي بحياتنا او حياة ناس قريبة مننا ازاي نقدر نوقف قبل ما الفاس تقع في الراس قبل مانقول ياريتني كنت بطلت قبل كل ده مايحصل انا بقول كده وبسأل ده لنفسي. متخيل ان الخروج دلوقتي ليا وكان لمعظم الناس اللي اعرفهم كان بدأ يرجع تاني وبننزل نشوف بعض ونهزر ونضحك ونقعد نقول لا الموضوع بعيد بس هو مش بعيد وممكن يحصلنا في اي لحظة. مش شايف بصراحة حل للموقف بس انا كده كده هعزل نفسي الاسبوعين دول في اوضتي. واتمنى متكونش كورونا وديه تبقى هواجس في دماغي.