شوية كراكيب

الشجاعة من صفاتي المفضلة، جدتي كانت بتلومني على قلة سؤالي زمان عنها ب"كنتي فين يا جبانة؟"، وقتها كنت بستغرب إن إيه الشجاعة في مجرد إني ابقى موجودة؟ لكن بعدين استوعبت إن دفع تكلفتنا من الود محتاج شجاعة. إني أخذ قرارات مش عايزها بس لازم تتعمل بيتطلب شيء من الشجاعة. قطع الصلة بأجزاء من ماضينا أو وصل الصلة بأجزاء تانية محتاج شجاعة. مواجهة خوفنا لوحدنا بدون مظلومية محتاج شجاعة، التعاطف مع آلام الآخرين بدون الغرق فيها محتاج شجاعة، ومحتاجين شجاعة إننا نصحى كل يوم عارفين إنه هيبقى يوم صعب لكن هنمرره بأقل قدر ممكن من التقل.

بحب الشجعان، ومن ضمن كثير من الأشياء أحب أكون على الدوام شخص شجاع، لا يتعالى على ألمه ولا يستمتع بيه، لا يخفي ضعفه عن أحبائه ولا يعرضه على المشاع، لا يغرق تمامًا في المشاكل ولا يهرب منها.

بفتكر الجملة دي كتير للعالم تيودور ادورنو اللي شاف إن بعد اللي حصل في اوشفيتز المفروض الناس تبطل تكتب شعر وتعتزل الفن والمزيكا والسينما، لإنه ببساطة الفن اثبت عجزه عن مواجهة الواقع اللي حصل في اوشفيتز. ولو مسمعتش عن اوشفيتز فأنا محبش أكون أول شخص يحكيلك عن اللي حصل هناك، بس يكفيك تعرف إنه كان معسكر اعتقال نازي في بولندا حصل فيه كل الشر والفظاعات اللي ممكن تتخيل الانسان يعملها في اخوه الانسان، شر خالص من أجل الشر نفسه، أذى من أجل الأذى نفسه، بالنسبة لمفكرين كتير اوشفيتز أثبت إن مفيش حدود للشر في البشر، معتقدش إننا شهدنا في التاريخ وقائع أبشع من كده.

كان فيه نكتة ملحده شوية بتوصف اللي حصل في اوشفيتز، بتحكي عن اتنين يهود من اللي اتعذبوا في اوشفيتز قاعدين في الجنة بيحكوا لبعض اللي حصلهم، واحد فيهم قال للتاني نكتة عن حاجة هناك والاتنين قعدوا يضحكوا، وهما بيضحكوا الرب كان معدي من جنبهم وسمع صوت الضحك، قرب وسألهم يقولوله النكتة، فردوا عليه وقالوله: مش هتفهمها، انت مكنتش هناك!

بمعنى إن الرب لو كان موجود هناك فعلا مكنش سمح بكل ده يحصل .. بالمناسبة دي النكتة المفضلة للكوميديان ريكي جيرفيه، فيه فيديو له وهو بيحكيها لجيري ساينفيلد، وساينفيلد بيقعد ساعة إلا تلت عشان يستوعبها.