ويبقى الأثر

مع الوقت بطّلت أبقى مؤمنة بما يسمى بالحب الفطري، لأن زي مافيه ناس كفرت بفطرتها وضلّت وظلمت وقست، في بردو ناس كرهت وكفرت بحبها على الرغم من القرب ومدى العلاقة، الأمومة مثلًا أو الأبوّة مش شهادة موثّقة للحب الغير مشروط، والاخوات مش دايمًا أكتر ناس قريبين منك وبيتمنّولك الخير لإنك من دمهم، كذلك الأبناء مش شرط يكونوا أبرّ الناس بأهلهم، وبيحبوهم فوق أى حد أو أى حاجة، فيه اللي بيكره وينفُر لو اتهان، أنا مش بقلل من قدسية العلاقات دي أبدًا، لكن اللي أقصده إنها مش كافية للركون إليها واتخاذها كضمان لدوام الحب، العلاقات دي تحديدًا، محتاجة مننا نرويها، ونطمّن أصحابها من وقت للتاني إننا بنحبهم لذاتهم مش لإنهم يقربولنا، محتاجة مننا نزيد الوصل والرباط اللي بينا وبينهم، وإننا بنحبهم حب صادق خالص، وإنهم مش مجرد قَدر اتفرض علينا، مش إن العلاقة بينا وبينهم عبارة عن توفية حقوق ورد للجميل وخوف من ربنا، ولأن القرابة مش هتغفر من القسوة شيء، وطول ما هي منزوعة الود هتتركن فـ أبعد نقطة في القلوب، ووجودها وقتها هيبقى زي عدمه..

الناس الصريحة نوعين نوع بيمارس صراحته بأريحية وسعادة كبيرة ف انه يقول كل اللي جواه ناحية حاجة او حد، ونوع بيتزنق ويتوتر لما يلاقي نفسه في موقف المفروض يكون صريح فيه علشان دي طبيعته لكن في نفس الوقت مش عايز يبقى قاسي، بيفضل يدور على أقل الكلام ضرر واللي بيه يقدر يوصّل مقصوده بشكل غير مباشر كأنه بيقول للي قدامه "افهم بقى انت الباقي علشان انا مش عايز أزعلك"، وده على أد ما هو حاجة حلوة إلا إنه بيستهلكنا جدًا، لأن فيه مواقف كتير بتكون محتاجة شِدّة، مواقف كتير بتكون محتاجة لكلام قاسي لأن الموقف نفسه بالفعل مش هين أبدًا، مواقف كتير بيكون لازم ترزع اللي جواك جملة واحدة وزي ما هو دون تجميل في وش صاحبها علشان هو فعلًا يستاهل ده..

كثيرة هي زهور الجنائز مقارنةً بزهورِ الأعياد، فَشعور الندم أقوى من شعورِ الٱمتنان، ذاك الذي لطالما تضوَّر حاجةً إلى القليل من هذا الإهتمام في حياته، والذي لربُما شكّل فارقًا عظيمًا فيها، ولكنّ البشر لا يمدحون إلا مَن لا يخافون أذيّته..

ولمّا يجيلنا تعب، نتمنّى لو بس نرجع عادي.. أد إيه العادي نعمة كُنّا بيها مش حاسّين..

يا صديقي، إنَّ اللَّه لحديث نفوسِنا، وخبايا صدورِنا، الله للتدبير ولا ألطف منه، اللَّه ليس لأمنياتنا فقط، ومناجاته ليست إحتياجًا، فمُناجاته حبًا، خيرًا من دعائه طلبًا، وحمده لا يكون في اللطائف فقط، ولا اللجوء إليه في الشدائد فقط، ورزقك ليس مالًا أو زوج فقط، والدُّعاء لدنيا فانية قلة بصيرة، فثمة تخفُّف من الدنيا يزيدنا قرباً، خيراً من نعيمٍ فيها يزيدنا بُعداً، والزُّهد في الدنيا فضيلة، والعبادات ليست بالفرض الثقيل، وكلنا أسباب، وقَدَرك آت، فالسلامة في وصله، والجنة في معيته، وإنَّا منه وإليه..

"قَالُواْ لَا تَوْجَلْ إِنَّا نُبَشِّرُكَ".

وأصلح اللهم عَطَب قلوبنا..

صباح الخير، كُل الخير.. للقلوبِ التي تُسقينا حُبًا، للوشوشِ البشوشة، وللأحضانِ التي تُنقذنا من الذبول..