#tiwala

Sabi nila, nakakahiya daw umutang. Totoo naman — kasi may pride tayong lahat. Ayaw nating magmukhang kapos, ayaw nating umamin na sa buhay, minsan, talo tayo.

Pero kung nakakahiya umutang, mas nakakahiyang maningil.

Kasi ang umutang, laging may dahilan. Pero ang maniningil, laging may panganib — na baka mawalan ng kaibigan, mapagkamalang maramot, o masyadong money-conscious.

Nagpautang ka kasi may tiwala ka. Tapos nung naningil ka na, ikaw pa ang nawalan ng tiwala sa sarili mo.

“Uy, sorry ah, singil lang sana sa utang mo…” — may "sorry" pa. Ba’t ikaw pa ang humihingi ng paumanhin?

Minsan ikaw pa ang lumalabas na epal. Tipong… “Hindi ka naman pinipilit na tumulong, bakit singil ka ng singil ngayon?” Puta, e di sana di na ako tumulong.

Ang masakit pa dyan, ‘yung taong umutang sayo? Biglang naglalike ng iPhone giveaway, nasa beach, may milk tea, nasa Shopee: “Check out successful!”

Pero sa utang mo? “Seen.”

Kaya minsan, hindi pera ang nawawala — dangal. Pagkatao. Yung prinsipyo mong, “tumulong ako kasi may puso ako,” nagiging, “tumulong ako, kaya akong apak-apakan.”

Kaya kung may balak kang umutang — Respeto naman sa taong sinagip ka sa alanganin. At kung may balak kang maningil — Tandaan mo: hindi mo sila inaagrabyado. Binabalikan mo lang yung bahagi ng pagkatao mong dati nilang hiningi.

At kung ikaw ang naipit sa gitna — Yung umutang pero ayaw singilin, o yung nagpautang pero ayaw ng gulo — malamang, ikaw na naman ang talo.

Pero ayos lang. Kasi hindi lahat ng talo, bayad sa pera. Minsan, bayad sa aral at karanasan.

======================

ni Alexia Fuentes

Tiwala

Ginawa ang lahat

Nagmahal nang buo

Kinilala nang husto

Ilang taong kasama mo

Sa alimpuyo ng takipsilim

Sa pagdaluyong ng panahon

Hanggang magkaisa ang mga puso

Walang dahilan

Upang pagduruda'y mamuo

Kahit na kung minsan

Natural tanungin kung bakit ako

Sinusuri ang mga sagot

Sa mga tanong na lumalagi

Sa mga bulong na namumutawi

Sa mga hikbi ng mga labi

Subalit

Matatawag bang pag-ibig

Kung siya ay tila pag-aari

Bagkus ay siya pang inuusig

Ako ba ay nasasakdal?

Ako ba ay nasasakal?

Ako ba ay iyo pang minamahal?

Sa mga bawal na ikaw din ang nagtakda

Maigi pa'y isukbit mo na lamang ako

Kung sa bawat paglipas ng minuto

Ika'y matindi pa sa pasistang estadong naniniktik

At hudas ang iyong bawat halik

Bagkus sa huli

Hindi ang dipa-dipang layo

Ang ultimong suliranin

Sa pag-ibig mo sa akin

Dahil wala kang tiwala

Wala nang magagawa pa

'Yan ang nag-iisang bagay