#making me

i

შეიძლება მე დამავიწყდეს ვინ ვარ, რა მქვია, მაგრამ ზუსტად ვიცი, შენ ეს გემახსოვრება, რადგან მანამდეც მიცნობდი და როცა საჭირო გახდება, ამას აუცილებლად გამახსენებ.

დაცულობის და ამას მოყოლილი სიმშვიდის მოცემას, რომლის დედამიწაზე პოვნაც წარმოუდგენლად რთულია, შენ რატომღაც უპრობლემოდ ახერხებ.

•

გითხარი მე შენ, ყველაფერი რაც გიკავშირდება მაგიურიამეთქი.

თვეების წინ დრაფტებში შენახული ჩანაწერი, რომლის შესახებაც არაფერი იცოდი, სიტყვა სიტყვით ამიხდინე და თავადაც ვერ მიხვდი ამით რა ქენი.

ყველაზე რთულია ნელა, ნახევრად გაცნობიერებულად კარგავდე შენთავს და ბურუსში გახვეული არც კი ეწინააღმდეგებოდე ამ პროცესს, რადგან ცხადად აღარ გახსოვს როგორი იყავი სანამ გარემოება გატკენდა, დაგცემდა და გონებაში საკუთარ ხატს გაგიფერმკრთალებდა. იშვიათად, მაგრამ მაინც, ზოგჯერ ადამიანურად სუსტი ვარ და ამას შენ უამრავი კილომეტრით და დროითი განზომილებით დაშორებული მაინც გრძნობ. მე მგრძნობ. ვერასდროს ავხსნი შენ ფენომენს და ეს კიდე უფრო მეტად მხიბლავს.

მე დამავიწყდა ვინ ვარ, რა მქვია, მაგრამ შენ ის გახსოვდა და ყველაზე სწორ დროს ყველაზე სწორი ფორმით გამახსენე. თავადაც არ ვიცოდი რომ ეს მჭირდებოდა, მაგრამ შენ ხვდებოდი. თვეების განმავლობაში ამ იდეას ხარშავდი და მაინც და მაინც ერთ კონკრეტულ ღამეს(საუკეთესო დროს) გამიზიარე. როგორ უნდა მითხრა ახლა, რომ არც ესაა ჯადოსნური? და რომ არც შენ ხარ ვარსკვლავბიჭუნა? რომ ყველას შეუძლია ჩემი ნისლიდან გამოყვანა, აბურდული აზრების და ემოციების გახსნა და დალაგება, ხელის ჩაკიდება და იმედის, მოტივაციის მოცემა? ვერ მეტყვი, რადგან შენ სხვა პლანეტის ბრჭყვიალა მტვერი დაგყვება თან, რადგან შენ პატარა უფლისწული ხარ, რადგან არავის შეუძლია ის, რაც შენ უნებურად იდეალურად გამოგდის.

•

ადრე ვითვლიდი, რამდენჯერ გადაარჩინე ჩემი არსება და რამდენჯერ მომაბრუნე კლდის ნაპირიდან უკან. უკვე აზრი აღარ აქვს ამ ნუმერაციას. ისე, ახლა ვხვდები ჩემი სიზმარი რას ნიშნავდა იცი? მწვანე ხასხასა, რბილ ბალახზე კლდის კიდესთან საკმაოდ ახლოს მსხდომნი, ზღვაში ულამაზეს მზის ჩასვლას რომ ვუყურებდით სხვა არაფერი იყო, თუ არა იმის ლატენტური გამოვლინება, რომ შენ ისევ დროულად გამომიწოდე ხელი, ისევ შეძელი ჩემში ამღვრეული წლის დამშვიდება და ისევ მომეცი საშუალება დავმტკბარიყავი ხედით, რომელიც მანამდე არ ჩანდა(უფრო მე ვერ ვხედავდი..).