#foreign debts

قارئین !گزشتہ کم و بیش 6 دہائیوں سے عالمی ساہوکار ادارے آئی ایم ایف نے ہماری معیشت کو جکڑ رکھا ہے جو اپنے قرض کے چند ارب ڈالرز کی وصولی کی خاطر اتنی سخت شرائط عائد کر دیتا ہے کہ انہیں عملی جامہ پہناتے ہوئے عوام کا بھرکس نکال دیا جاتا ہے۔ اسکے باوجود آئی ایم ایف ہم سے ڈومور کے تقاضے جاری رکھتا ہے۔ اس ادارے کی ڈور جن عالمی طاقتوں کے ہاتھ میں ہے، پاکستان کی آزادی اور خودمختاری کمزور کرنے کا ان کا اپنا ایجنڈا ہے جس پر آئی ایم ایف کے ذریعے عملدرآمد کیا جاتا ہے۔ چنانچہ جب تک ہم آئی ایم ایف کے شکنجے میں ہیں، اس وقت تک ہماری معیشت کے استحکام کا خواب شرمندہ تعبیر ہو سکتا ہے نہ ہم ایک خوددار اور خودمختار قوم کے طور پر اپنے پائوں پر کھڑے ہو سکتے ہیں۔ وزیر اعظم شہبازشریف کا یہ کہنا درست ہے کہ آئی ایم ایف سے خلاصی کیلئے ہمیں اپنے محصولات میں اضافہ کرنا ہو گا۔ تاہم حکومتی گورننس کیلئے یہ لمحہ فکریہ ہے کہ صاحب اختیار و اقتدار اور مراعات یافتہ حکمران اشرافیہ طبقات ہی سب سے زیادہ ٹیکس چوری اور ٹیکس نادہندگی میں شامل ہوتے ہیں۔ اسی طرح دیگر مختلف شعبہ ہائے زندگی کے طبقات بھی خود پر ٹیکس لاگو ہونے دیتے ہیں نہ واجب الادا ٹیکس خوش اسلوبی سے ادا کرنے کا کلچر انہوں نے اپنایا ہے۔ 

اس تناظر میں پیپلزپارٹی کے سابقہ دور حکومت کے وزیر خزانہ حفیظ شیخ، جو پی ٹی آئی کے دور میں بھی اس منصب جلیلہ پر فائز رہے، کی بجٹ تقریر کے یہ الفاظ ضرب المثل بن چکے ہیں کہ ملک کے منتخب ایوانوں میں بیٹھے 1200 ممبران میں سے 850 ممبرز اپنے ذمہ واجب الادا ٹیکس کی مد میں ایک دھیلہ بھی قومی خزانے میں جمع نہیں کراتے۔ اگر صاحب اقتدار و اختیار طبقات ہی ٹیکس چوری میں مبتلا ہوں تو عام عوام سے رضاکارانہ طور پر ٹیکس ادا کرنے کی بھلا کیا توقع کی جا سکتی ہے۔ اسکے باوجود عام تنخواہ دار مزدور طبقات ہی اپنے ذمہ واجب الادا ہر قسم کے ٹیکسز ادا کرتے اور اسکے باوجود ریاست کے فریضے میں آنے والی اپنی سہولتوں اور ضروریات سے محروم رہتے ہیں۔ وزیراعظم کا یہ کہنا بھی اپنی جگہ درست ہے کہ کھربوں کے ٹیکس مقدمات عدالتوں میں زیرالتوا ہیں، جنکے فوری فیصلہ کی ضرورت ہے۔ ان میں بلاشک و شبہ زیادہ تر مقدمات انہی حکمران اشرافیہ اور دوسرے پروفیشنل طبقات بشمول تاجروں، صنعتکاروں کے دائر کردہ ہیں جو ٹیکس ادا کرنے سے گریز کرتے ہیں۔ 

یہ بادی النظر میں حکومتی گورننس اور متعلقہ انتظامی مشینری کی کمزوری ہے کہ وہ اپنی اتھارٹی بروئے کار لانے سے دانستہ یا کسی مصلحت کے تحت گریز کرتی ہے جبکہ تنخواہ دار طبقات کی تنخواہوں سے انکم ٹیکس کی جبراً کٹوتی کی جاتی ہے۔ یوٹیلیٹی بلوں میں لاگو کئے گئے مختلف قسم کے ٹیکس بھی تو عام عوام سے جبراً ہی وصول کئے جاتے ہیں اور انہیں متعلقہ سہولت بھی بمشکل ہی فراہم کی جاتی ہے جبکہ حکومتی اقدامات سے اٹھنے والے مہنگائی کے سونامیوں کی زد میں بھی عام عوام ہی آتے ہیں۔ اس صورتحال میں فطری طور پر لوگوں کے ذہنوں میں یہ سوال بھی اٹھتے ہیں کہ 1951 سے اب تک ملک کی ہر حکومت نے جو قرضے آئی ایم ایف سے حاصل کئے ہیں، ان میں سے کتنی رقم ملک اور عوام کی بہتری اور فلاح پر خرچ ہوئی ہے۔ کتنی ترقیاتی منصوبوں پر لگی اور کتنی رقم صاحب اختیار طبقات کی جیبوں میں گئی۔ اسی طرح آئی ایم ایف سے خلاصی پانے اور قومی معیشت کو اپنے پائوں پر کھڑا کرنے کے نام پر اربوں ڈالر کی جو امداد چین، سعودی عرب، متحدہ عرب امارات اور قطر سے لی گئی، کیا وہ امداد اور بیل آئوٹ پیکیج اس مقصد کے تحت ہی بروئے کار لائے گئے؟ 

حکومت کی جانب سے عوام کو مہنگائی سے نجات دلانے کا کریڈٹ تو شدومد سے لیا جاتا ہے مگر حکومت کے اعلان کردہ ریلیف پیکیجز سے کیا عوام حقیقی معنوں میں مستفید بھی ہوئے ہیں؟ اس حوالے سے اعلانات، دعوئوں اور حقائق کا ضرور جائزہ لیا جانا چاہیے۔ بے شک ٹیکس سسٹم میں ہمہ وقت اصلاحات کی ضرورت ہے مگر ان اصلاحات کا رخ مراعات یافتہ اشرافیہ طبقات کے مزید فائدے کی جانب ہو گا تو اس سے عوام میں مزید بدگمانیاں پیدا ہونگی ۔ دوسری جانب پیپلز پارٹی کے چیئرمین بلاول بھٹو زرداری نے وفاقی حکومت کو خبردار کیا کہ اگر کینالز (نہروں) کا منصوبہ واپس نہ لیا گیا تو پیپلز پارٹی حکومت کا ساتھ نہیں دے گی۔ بظاہر ایسا محسوس ہوتا ہے کہ پیپلز پارٹی نے اس نہری منصوبے کو سیاسی مسئلہ بنا لیا ہے، حالانکہ یہ منصوبہ اسی اتحادی حکومت کا ہے جس میں پیپلز پارٹی شامل ہے۔ بلاول بھٹو زرداری نہ صرف حکومت سے علیحدگی کی دھمکی دے رہے ہیں بلکہ بلاول کا یہ بھی کہنا تھا کہ 6 میں سے 2 نہروں کی منظوری ’’قیدی نمبر 420‘‘ نے دی تھی۔ اگر ان 2 نہروں کی منظوری قومی مفادات کے خلاف ہے تو ان پر نظرثانی کر لیں، لیکن باقی 4 نہریں جو موجودہ اتحادی حکومت نے منظور کی ہیں، ان پر مخالفت کی بنیاد کیا ہے؟

یہ امر بھی قابل غور ہے کہ صدر مملکت آصف علی زرداری، شروع میں ان نہری منصوبوں کی حمایت کرتے رہے، لیکن پارلیمنٹ کے مشترکہ اجلاس میں وہ ان کی مخالفت کرتے دکھائی دیئے۔ سندھ میں جیسے ہی سیاسی بنیادوں پر ان نہروں کے خلاف آواز بلند ہوئی، پیپلز پارٹی نے بھی خود کو اس بیانیے کا حصہ بنا لیا۔ پیپلز پارٹی جو حکومت کی اتحادی جماعت ہے، اس وقت حکومت کو تقویت دینے کے بجائے اسے دبائو میں لاتی دکھائی دے رہی ہے۔ یہ وہی جماعت ہے جس نے ماضی میں کالا باغ ڈیم جیسے اہم منصوبے کی شدید مخالفت کی اور یوں وہ منصوبہ کبھی مکمل نہ ہو سکا۔ اب پیپلز پارٹی نئی نہروں کی مخالفت کر کے ایک اور ایسا ہی متنازع مسئلہ کھڑا کرنا چاہتی ہے۔

خلیل احمد نینی تا ل والا

پاکستان کی برآمدات کا دارومدار تاریخی طور پر بیرون ملک سے درآمد کی جانے والی مشینری، خام مال اور کیمیکلز پر رہا ہے جسکی وجہ سے جیسے جیسے شرح نمو یا ترقی کی رفتار تیز ہوتی ہے درآمدات کی ادائیگی کیلئے ہمارے زرمبادلہ کے ذخائر پر دبائو بڑھنا شروع ہو جاتا ہے۔ اسکے نتیجے میں یا تو شرح نمو کو کم کرنے کیلئے درآمدات پر پابندیاں لگانی پڑتی ہیں یا عالمی مالیاتی اداروں سے قرض لینا پڑتا ہے تاکہ بیرونی ادائیگیوں کا توازن برقرار رکھا جا سکے۔ اس کے علاوہ زرمبادلہ کے حصول کا ایک اور اہم ذریعہ براہ راست غیر ملکی سرمایہ کاری ہے۔ تاہم اس کیلئے بھی سرمایہ کاری کرنیوالی غیر ملکی کمپنیوں یا ممالک کو پرکشش مراعات اور ترغیبات دینا ہماری مجبوری ہے کیونکہ مجموعی طور پر خطے کی صورتحال اور ہمارے سیاسی حالات کی وجہ سے پاکستان براہ راست غیر ملکی سرمایہ کاری کی ترجیحی فہرست میں بہت نیچے ہے۔ اس کی ایک وجہ یہ بھی ہے کہ بیرونی سرمایہ کاری کے حصول کی خاطر ہماری حکومتیں جو وعدے کرتی ہیں وقت گزرنے کے ساتھ ساتھ ان پر عمل درآمد کرنا ممکن نہیں رہتا ہے۔

ایسے میں بیرونی سرمایہ کار بھی اپنے منافع کو جلد از جلد پاکستان سے باہر منتقل کرنے کی تگ و دو میں رہتے ہیں جسکی وجہ سے زرمبادلہ کے حصول کا یہ ذریعہ بھی ہمارے لئے معاشی استحکام کا باعث نہیں بن سکا ہے۔ حکومت نے حال ہی میں برآمدات بڑھانے کیلئے جو پانچ سالہ منصوبہ پیش کیا ہے اس میں ان چیلنجز کو مدنظر رکھ کر ترقی کے ماڈل کو نئے سرے سے ترتیب دینے کی ضرورت ہے۔ اس کیلئے ضروری ہے کہ برآمدات بڑھانے کیلئے درآمدات پر انحصار کم کیا جائے اور بیرون ملک سے درآمد کی جانے والی اشیاء یا مصنوعات کے مقامی متبادل تیار کرنے پر توجہ دی جائے۔ اس طرح صنعتی خام مال اور ویلیو چین میں بھی مقامی پیداوار پر انحصار بڑھانے کی ضرورت ہے۔ اس طرح نہ صرف مقامی انڈسٹری کو فروغ ملے گا بلکہ روزگار کے مواقع بڑھانے کے ساتھ ساتھ مقامی منڈیوں کی ضروریات پوری کر کے قیمتی زرمبادلہ بھی بچایا جا سکے گا۔ اس سلسلے میں زرعی مشینری کی تیاری، تصدیق شدہ بیجوں کی دستیابی اور کیمیائی کھادوں اور زرعی ادویات کے بیجا استعمال کو روکنے کیلئے قدرتی کھاد کے استعمال کو فروغ دینے کی ضرورت ہے۔

درآمدات کے حوالے سے پالیسی میں یہ تبدیلی ایک مستحکم میکرو اکنامک ماحول فراہم کرنے میں مددگار ثابت ہو گی جس کے نتیجے میں برآمدات بڑھانے کیلئے درکار جدید ٹیکنالوجی کے حصول کیلئے ہمیں زرمبادلہ کی قلت کا سامنا نہیں کرنا پڑے گا۔ علاوہ ازیں اس سے بیرونی سرمایہ کاری کیلئے بھی ملک میں موزوں ماحول کی تشکیل میں مدد ملے گی۔ گزشتہ چند دہائیوں میں گلوبلائزیشن کی وجہ سے مینو فیکچرنگ کا عمل تیزی سے ترقی پذیر ممالک میں منتقل ہوا ہے جس کی وجہ سے متعدد ممالک عالمی سپلائی اور ویلیو چینز میں شامل ہو کر ترقی کی شاہراہ پر گامزن ہیں۔ ایسے ممالک کیلئے سب سے بڑا چیلنج یہ ہے کہ وہ عالمی سطح پر اپنی مسابقت کس طرح برقرار رکھ پاتے ہیں کیونکہ جیسے جیسے کسی ملک میں صنعتی ترقی کا عمل آگے بڑھتا ہے وہاں ہنر مند افرادی قوت کی مانگ میں بھی اضافہ ہوتا ہے۔ ایسے میں سپلائی اور ویلیو چین میں بین الاقوامی انضمام کو برقرار رکھنے اور مزید بہتر بنانے کیلئے، معیار، اختراع اور علم کی تخلیق کے ساتھ ساتھ پیداواری صلاحیت میں اضافہ ضروری ہو جاتا ہے تاکہ پیداواری لاگت کو کم سے کم رکھ کر مضبوط مسابقتی فوائد حاصل کئے جا سکیں۔ 

اس تناظر میں دیکھا جائے تو گزشتہ ایک دہائی میں پاکستان کی برآمدات ایک مخصوص حد سے اوپر نہیں جا سکی ہیں۔ اس کے مقابلے میں ہمارے خطے کے دیگر ممالک کی برآمدات میں اس عرصے کے دوران نمایاں اضافہ ہوا ہے۔ علاوہ ازیں علاقائی حریفوں انڈیا، بنگلہ دیش اور ویت نام کے مقابلے میں پاکستان کی برآمدات مجموعی قومی پیداوار میں اپنا تناسب بڑھانے میں ناکام رہی ہیں۔ ایسے میں برآمدات بڑھانے کیلئے موثر کارکردگی دکھائے بغیر ملک کی معاشی ترقی کا خواب شرمندہ تعبیر نہیں ہو سکے گا۔ اس سلسلے میں ضروری ہے کہ ہر شعبے میں پیداواری صلاحیت کو بڑھایا جائے۔ اس حوالے سے ہونیوالی ایک عالمی تحقیق کے مطابق 60 فیصد ممالک جنکی مجموعی پیداواری صلاحیت میں اضافے کی شرح تین سے آٹھ فیصد یا اس سے زیادہ تھی وہ معاشی استحکام کی منزل حاصل کر چکے ہیں جبکہ دوسری طرف جن ممالک کی مجموعی پیداواری صلاحیت میں اضافے کی شرح تین فیصد سے کم تھی وہ تاحال معاشی بحران کا شکار ہیں۔ اس لحاظ سے دیکھا جائے تو پاکستان کی اوسط شرح نمو ڈیڑھ یا دو فیصد سے زیادہ نہیں بنتی۔

چنانچہ برآمدات کو بڑھانے کیلئے پیداواری صلاحیت کے ساتھ ساتھ ٹیکنالوجی ٹرانسفر اور ہنرمند افرادی قوت کی تیاری کیلئے ترجیحی بنیادوں پر کام کرنے کی ضرورت ہے۔ اس کیلئے معیشت میں سرمایہ کاری کی ضرورت ہوتی ہے جبکہ پاکستان میں صنعتی اداروں کا زیادہ تر سرمایہ ریفنڈ کی مد میں یا تو حکومت کے پاس جمع ہے یا پھر وہ مہنگی توانائی کے چیلنج کا مقابلہ کرنے کیلئے اپنے وسائل شمسی توانائی کے حصول پر خرچ کرنے کیلئے مجبور ہیں۔ پاکستان میں گزشتہ تین دہائیوں کے دوران مقامی و غیر ملکی سرمایہ کاری کے تناسب میں بھی کمی آئی ہے۔ اس کی بڑی وجہ یہ ہے کہ ہمارے ہاں کاروبار کرنا ہر گزرتے دن کے ساتھ مشکل سے مشکل تر ہوتا جا رہا ہے اور اب تو یہ نوبت آ چکی ہے کہ ملک کے بڑے صنعتی ادارے اپنے سرمائے کو تحفظ دینے اور دیگر معاشی فوائد کے حصول کی خاطر بیرون ملک سرمایہ کاری کو ترجیح دے رہے ہیں۔ اس سے نہ صرف مقامی سطح پر انڈسٹری کا مستقبل غیر یقینی صورتحال سے دوچار ہے بلکہ روزگار کے مواقع بھی محدود ہو رہے ہیں۔

چوہدری سلامت علی

پاکستان ایک آزاد اورخود مختار ریاست ہے جس کا اپنا آئین اور قانون ہے لیکن بدقسمتی سے ہمارے ارباب اقتدار کی غلامانہ اور مفلوج سوچ نے ملک کو بحرانوں میں مبتلا کر دیا ہے۔ ملک و قوم کو ایسی قیادت کی ضرورت ہے جو حقیقی معنوں میں محب وطن اور عوام کی ترجمان ہو۔ ملک میں دن بدن کرپشن بڑھتی جا رہی ہے۔اس وقت چونسٹھ فیصد غریب شہری اپنے جائز کام کروانے کیلئے بھی رشوت کا سہارا لینے پر مجبور ہیں۔ پاکستان کی 76 سالہ تاریخ گواہ ہے کہ وطن عزیز میں کرپشن کی جڑیں روزِ اول سے ہیں جو وقت کیساتھ اب مضبوط ہو چکی ہیں اور یہ قومی وجود کو دن بدن دیمک کی طرح کھا رہی ہے۔ کرپشن ایک ایسا عفریت ہے جو کسی ریاست کے نظم حکمرانی اور معاشرتی ڈھانچے کو تہہ وبالا کرنے کا باعث بنتی ہے۔ امر واقعہ ہے کہ وطن عزیز پاکستان میں داخلی انتشار، افراتفری اور سیاسی عدم استحکام نے ملک کونا قابل تلافی نقصان پہنچایا ہے۔ اس وقت حکومت کے بیرونی قرضوں میں مجموعی طور پر 3 ہزار 919 ارب روپے کا مزید اضافہ ہو گیا ہے مگر دوسری طرف حکومت جھوٹے دعووں کے ذریعے عوام کو گمراہ کر رہی ہے۔ معیشت کی بحالی موجودہ پالیسیوں سے ممکن نہیں لگتی۔ طرفا تماشا یہ ہے کہ پنجاب میں رواں سال گندم کی کاشت کا ہدف ساڑھے 16 ملین ایکڑ کا تھا مگر صرف 12 ملین ایکڑ رقبے پر گندم کی فصل کی کاشت ہوئی ہے۔

اس وقت پاکستان میں بجلی کی قیمت خطے کے دیگر ممالک کے مقابلے میں دگنی ہے، اگر بجلی کی قیمت 9 سینٹ فی یونٹ ہو جائے تو ٹیکسٹائل ایکسپورٹ چند سالوں میں دگنی ہو سکتی ہے۔ اسٹیٹ بینک کو شرح سود میں کمی کے لئے فوری اقدامات کرنا چاہئیں۔ ایشیائی ترقیاتی بینک سے 33 کروڑ ڈالر قرض کا حصول بھی ملکی معیشت کو مزید مشکلات سے دوچار کرے گا۔ المیہ یہ ہے کہ حکومت نے قرضوں کے پہاڑ کھڑے کر دیئے ہیں۔ عوام کی فلاح و بہبود کے نام پر وصول کیا جانے والا قرض درحقیقت اشرافیہ کے اللوں تللوں اور پروٹوکول پر خرچ ہو جاتا ہے ۔ یہی وجہ ہے کہ آج ملک کے اندر ہر پاکستانی تین لاکھ روپے کا مقروض ہو چکا ہے۔ آج پاکستان کو جن مسائل کا سامنا ہے ان میں کمزور معیشت، دہشت گردی، سیاسی عدم استحکام اور باہمی اتحاد ویگانگت کی کمی جیسے مسائل اہم ترین ہیں۔ ستم ظریفی یہ ہے کہ قرض اتارنے کیلئے مزید قرض لینا پڑ رہا ہے، آئے دن بجلی، گیس اور تیل کے نرخ بھی بڑھائے جاتے ہیں جس نے عام آدمی کا جینا دوبھر کر دیا ہے۔ حقیقت یہ ہے کہ ملک میں سرمایہ کاری نہ ہونے کے برابرہے جبکہ تجارتی خسارہ بھی بڑھتا چلا جا رہا ہے، ترقی کی شرح خطرناک حد تک کم ہو گئی ہے جبکہ کاروبار انتہائی سست روی کا شکار ہے۔ 

وقت کا تقاضا ہے کہ ہمارے ارباب اقتدار ایسی پالیسیاں مرتب کریں جن سے ملک و قوم کی عز ت و وقار میں اضافہ ہو۔ امریکہ سمیت دنیا کے کسی بھی ملک کے ساتھ تعلقات کو برابری کی سطح پر استوار کرنے کے لئے ہمیں کشکول لے کر دنیا میں گھومنے کا سلسلہ ختم کرنا ہو گا۔ مقام افسوس ہے کہ ہمارے بیشتر حکمرانوں نے کفایت شعاری کی بجائے قوم کو بھکاری کا تشخص دیکر پوری دنیا میں رسوا کر دیا ہے۔ لمحہ فکریہ ہے کہ بنگلہ دیش، بھارت سمیت چین، جنوبی کوریا، ملائشیا، جنوبی افریقہ جیسے ممالک جو ہمارے بعد آزاد ہوئے وہ ہم سے کہیں زیادہ ترقی یافتہ ہیں۔ پاکستان خطے کا سب سے مہنگا ترین ملک بن چکا ہے عوام کی زندگی اجیرن ہو چکی ہے اشیاخوردونوش کی قیمتوں میں ہوشر با اضافے کے بعد ہر چیز قوت خرید سے باہر ہو گئی ہے۔ ایسا محسوس ہوتا ہے کہ موجودہ حکومت مراعات یافتہ طبقے کی حکومت ہے، جسے مافیاز نے چاروں اطراف سے گھیرا ہوا ہے۔ اب کسانوں کا معاشی قتل عام کر کے زراعت کو بھی تباہ و برباد کیا جا رہا ہے۔ کاشتکار شدید پریشان ہیں انھیں فصلوں کے سرکاری ریٹ نہیں دیئے جا رہے۔

سرکاری محکموں کی صورتحال بھی دگرگوں ہے۔ 2014ء سے ابتک مجموعی طور پر اداروں کو 5900 ارب روپے کا نقصان پہنچ چکا ہے۔ سرکاری ادارے تباہی کی طرف بڑھ رہے ہیں جب کہ حکمران صرف اقتدار کو انجوائے کرنے میں مصروف ہیں۔ بد قسمتی سے ملک کے اندر مافیاز اور اشرافیہ کے سوا کوئی ایک طبقہ بھی ایسا نہیں جو خوشحال ہے۔ ہمارے حکمرانوں کو ملک میں مہنگائی بدامنی، بیروزگاری اورسیاسی ومعاشی عدم استحکام ختم کرنے کی فکرکرنی چاہئے۔ ملک اس وقت مشکل حالات سے گزر رہا ہے نہ امن وامان ہے اور نہ بنیادی سہولیات، معیشت کی صورتحال بھی بہت خراب ہے۔ ان حالات میں وفاقی وزیر خزانہ کی جانب سے مزید ٹیکس لگانے کے بیان سے عوام میں تشویش کی لہر دوڑ گئی ہے۔ آئندہ تین برسوں میں ٹیکس ٹو جی ڈی پی کی شرح 10.3 سے بڑھا کر 13.5 فیصد تک لے جانے کے اقدامات کیے جارہے ہیں۔ جس سے ثابت ہوتا کہ حکومت قوم کے ساتھ جھوٹ بول رہی ہے۔ حکومت کو ٹیکسوں کی شرح بڑھانے کی بجائے ملک میں بڑے ٹیکس نا دہندگان کو ٹارگٹ کرنا چاہئے نا کہ وہ مسلسل غریبوں پر ہی بوجھ ڈالتی جائے۔

محمد فاروق چوہان

موجودہ حکومت کو معرض وجود میں آئے ہوئے تقریباً نو ماہ ہونے کو ہیں اور کوئی شک نہیں کہ اس نے اِن نو مہینوں میں معاشی بہتری کے لیے بہت سے کام کیے ہیں لیکن کیا اُن کے نتیجے میں ہم اس خطرناک صورتحال سے باہر نکل آئے ہیں اور ڈیفالٹ ہو جانے کا خطرہ یقیناً ٹل چکا ہے۔ اس کا جواب یقیناً نہ اور نفی میں ہوگا۔ ابھی ہمارے ڈیفالٹ ہوجانے کا خطرہ صرف دو تین مہینوں کے لیے ٹلا ہے۔ 2021 برادر اسلامی ملک سعودی عرب نے انتہائی برے وقت میں ہمارا ہاتھ پکڑا اور تین ارب ڈالر ہمارے خزانے میں صرف اس مقصد سے ڈیپازٹ کر دیے کہ ہم کہیں حقیقی طور پر دیوالیہ ظاہر نہ ہو جائیں۔ دنیا کی نظروں میں ڈیفالٹ ہونے سے بچانے کی خاطر سعودی عرب نے ایک حقیقی دوست اور بھائی کا کردار ادا کیا۔  حالانکہ اسے معلوم تھا کہ یہ تین ارب ڈالر اسے ایک سال میں واپس بھی نہیں ملیں گے اور ہوا بھی ایسا ہی ہم ہر سال ایک درخواست لے کر اُن کے دربار میں پہنچ جاتے ہیں اور مزید ادھار مانگنے کے بجائے یہی تین ارب ڈالرزکی واپسی کے لیے مزید مہلت مانگ لیتے ہیں۔ سوال یہ ہے کہ اگر سعودی ارب یہ مہلت دینے سے انکار کر دے تو ہم کہاں کھڑے ہونگے؟ معاشی طور پر دیوالیہ ہوجانے سے بچ جانے کے ہمارے دعوے کتنے درست اور حقیقی ثابت ہوں گے۔

کیا ہم دھڑام سے زمین بوس نہیں ہوجائیں گے۔ یہی حال UAE سے لیے تین ارب ڈالروں کا بھی ہے اور چین سے ادھار پیسوں کا بھی۔ ہم کب تک اسی طرح کام چلاتے رہیں گے اور اپنے آپ اور قوم سے جھوٹ بولتے رہیں گے۔ IMF اگر ہمیں نئے قرض کی منظوری نہیں دیتا تو بھی ہمیں ڈیفالٹ ہوجانے سے کوئی بھی نہیں بچا سکتا تھا۔ پھر یہ ادھار کے ڈالرز بھی کام نہیں آتے۔ IMF کی مہربانی سے ہمیں کچھ دنوں کے لیے سانس لینے کا موقع ضرور مل گیا ہے لیکن دیوالیہ ہوجانے کے خطروں سے ابھی ہم باہر نہیں نکل پائے ہیں۔ حیران کن بات یہ ہے کہ ابھی ہمیں IMF کے قرض سے صرف ایک قسط ملی ہے اورہم نے اپنے شاہانہ خرچ یک دم بڑھا دیے ہیں۔ ایک ماہ قبل ججوں کی تنخواہوں میں دو سو فیصد اضافہ کر دیا اور اب اپنے پیٹی بھائیوں یعنی پارلیمنٹرین کی مشاہرے میں بڑا اضافہ کر دیا۔ حکومت ایک طرف ٹیکس جمع کرنے کے مطلوبہ ہدف کو پورا بھی نہیں کر پا رہی ہے اور دوسری طرف اپنے اخراجات میں بے تحاشہ اضافہ بھی کر رہی ہے، حالانکہ وزیر اعظم اور وزیر خزانہ نے ایک بار نہیں کئی بار قوم کو یقین دہانیاں کروائی ہیں کہ حکومت اپنے اخراجات کم کرنے والی ہے اور آنے والے دنوں میں ہم واضح طور پر اس کمی کو دیکھ پائیں گے، مگر افسوس سے کہنا پڑتا ہے کہ حکومت نے اپنے اس وعدے کی ایک شق پر بھی عمل نہیں کیا۔

حکمرانوں اور پارلیمنٹرین میں سے ایک شخص بھی ایسا نہیں سامنے آیا جس نے اس غیر ضروری اضافے کو مسترد کیا ہو یا اس کی مخالفت کی ہو۔ عوام سے تو توقع کی جاتی ہے کہ وہ ملک کے معاشی حالات کو دیکھتے ہوئے اپنے اخراجات کم کر دے اور قربانیوں پر قربانیاں دیتی رہے لیکن اعلیٰ عہدوں پر بیٹھے یہ تمام کے تمام افراد اپنے اخراجات ایک فیصد بھی کم کرنے کو تیار نہیں، بلکہ وہ اس اضافے کے ثمرات سمیٹ لینے کے لیے مکمل طور پر متفق اور متحد ہیں۔ اپوزیشن میں سے بھی کسی ایک شخص نے اس اضافے کے خلاف ایک آواز بھی بلند نہیں کی۔ ویسے وہ حکومت کے ہر کام پر تنقید اور تنقیص کرتے دکھائی دیتے ہیں مگر ذاتی مفاد کے اس فیصلے پر وہ بھی خاموشی طاری کیے ہوئے ہیں۔ مہنگائی کے حوالے سے حکومت کا دعویٰ ہے کہ اس نے دس مہینوں میں بڑھتی مہنگائی کی شرح چھ فیصد تک لے آئی ہے۔ یہ کہتے ہوئے وہ سمجھتی ہے کہ اس نے عام عوام کے لیے مہنگائی بہت کم کر دی ہے۔ حالانکہ دیکھا جائے تو سوائے ایک آدھ چیز کے مہنگائی کسی اور شہ میں کم نہیں ہوئی ہے، بلکہ اس میں کچھ اضافہ ہی ہوا ہے۔ مہنگائی میں کمی کے دعوے کرتے ہوئے یہ بھول جاتی ہے کہ مہنگائی کی روز افزوں شرح جو ایک سال پہلے تک تیس فیصد تک پہنچ چکی ہے وہ اب چھ سات فیصد تک آگئی ہے۔

یعنی مہنگائی تو پھر بھی ہو رہی ہے۔ بے تحاشہ کے بجائے چھ سات فیصد ماہانہ کی شرح پر۔ اب ہمیں بتایا جائے کہ عوام کو اس طرح کیا ریلیف ملا۔ اسے تو آج بھی اپنی اسی آمدنی سے چھ فیصد مزید مہنگی چیزیں خریدنی پڑ رہی ہے۔ بات تو جب تھی کہ جن اشیائے ضروریہ کے دام پہلے ہی بڑھ چکے تھے انھیں کم کیا جاتا۔ نہ کہ مزید چھ سات فیصد اضافہ کر کے عوام کو ریلیف بہم پہنچانے کے دعوے کیے جاتے۔ دنیا کے ہر ملک میں جو چیزیں پیدا ہوتی ہیں یا بنائی جاتی ہیں وہ وہاں کے عوام کو ہمیشہ سستی اور ارزاں قیمتوں پر ملا کرتی ہیں لیکن ہمارے یہاں کا معاملہ عجیب و غریب ہے۔ یہاں ہر چیز چاہے وہ امپورٹ کی گئی ہو یا خود ہمارے یہاں پیدا ہوتی ہوں، بین الاقوامی قیمتوں کے مطابق دستیاب ہونگی۔ گندم ، چاول اور چینی وافر مقدار میں ہمارے اپنے یہاں پیدا ہوتی ہے لیکن عوام کو وہ بھی ڈالرکی قیمت یا دوسرے ملکوں میں ملنے والی قیمت کے حساب سے مہیا کی جاتی ہیں۔ اس کے لیے بہانہ یہ بنایا جاتا ہے کہ اگر سستی ہونگی تو پھر ان اشیاء کی اسمگلنگ شروع ہو جائے گی۔ ہماری سمجھ میں نہیں آتا کہ معاشی حوالے سے حکومت کی ترجیحات کیا ہیں۔

لانگ ٹرم منصوبے کیا ہیں۔ صرف وقتی علاج اور قرض حاصل کر کے خزانے کا وزن بڑھا دیا گیا ہے۔ پی آئی اے اور مالی بحران کے شکار کئی ادارے آج بھی قوم کے خون پسینے کی کمائی کھا رہے ہیں۔ انھیں فروخت کرنے یا پرائیوٹائز کرنے میں سست روی دکھائی جا رہی ہے۔ دو تین برسوں سے سنتے آئے ہیں کہ کئی ادارے نجی تحویل میں دیے جانے کا پروگرام ہے لیکن ایک ادارہ بھی آج تک فروخت نہیں کیا گیا۔ خسارے میں چلنے والے ادارے اب اس حال میں پہنچ چکے ہیں کہ کوئی بھی انھیں خریدنے والا نہیں۔ ملک میں پائی جانے والی معدنیات کے حوالے سے بھی کوئی ٹھوس پالیسی سامنے نہیں آئی ہے۔ انھیں نکالنے کے منصوبے ابھی تک محض کاغذوں پر موجود ہیں۔ ہمارے پڑوسی ممالک بھی ہم سے بہت آگے نکل چکے ہیں اور ہم چند مہینوں کے زرمبادلہ کے ذخائر جمع کر لینے پر اطمینان کا اظہار کر رہے ہوتے ہیں۔ وہ ذخائر جو دوست ممالک کی مہربانیوں کی وجہ سے قائم ہیں، وہ اگر قائم نہ رہیں تو پھر ہمارا کیا ہو گا؟ سوچنے اور غور کرنے کی بات ہے صرف تسلیاں دینے سے اب کام نہیں چلے گا۔

ڈاکٹر منصور نورانی

موجودہ حکومت سے ہرگز یہ توقع نہ تھی کہ IMF سے قرضہ منظورہوتے ہی وہ بے دریغ اپنے اخراجات بڑھا دے گی۔ وہ صبح وشام عوام سے ہمدردی اور انھیں ریلیف بہم پہنچانے کے دعوے توبہت کرتی رہتی ہے لیکن عملاً اس نے انھیں کوئی ایسا بڑا ریلیف نہیں پہنچایا ہے جیسا اس نے اپنے وزرا اور ارکان پارلیمنٹ کو صرف ایک جھٹکے میں پہنچا دیا ہے۔ ہمارے وزیر خزانہ ہر بار عوام کو یہ تسلیاں دیتے دکھائی دیتے ہیں کہ آپ اگلے چند ماہ میں حکومتی اخراجات کم ہوتے دیکھیں گے۔ اُن کے مطابق حکومت جسے اپنے غریب عوام کا بہت خیال ہے وہ بہت جلد سرکاری اخراجات کم کرے گی، مگر ہم نے پچھلے چند ماہ میں اخراجات کم ہوتے تو کیا بلکہ بے دریغ بڑھتے ہوئے ہی دیکھے ہیں۔ افسوس سے کہنا پڑتا ہے کہ ہمارے نام نہاد مسیحا عوام سے تو ہر وقت قربانی دینے کی درخواستیں کرتے ہیں لیکن خود وہ کسی بھی قسم کی قربانی دینے کو تیار نہیں ہیں۔ یہ سارے کے سارے خود ساختہ عوامی غم خوار اللہ کے فضل سے کسی غریب طبقہ سے تعلق نہیں رکھتے ہیں۔

اِن میں بہت سے بڑے بڑے جاگیردار اور سرمایہ دار لوگ ہیں۔ پشت درپشت اِن کی جاگیریں ان کی اولادوں میں بٹتی رہی ہیں۔ اُن کی زمینوں کا ہی تعین کیا جائے تو تقریباً آدھا پاکستان انھی لوگوں کی ملکیت ہے۔ اِنکے گھروں میں وہ فاقے نہیں ہو رہے جن سے ہمارے بیشتر عوام دوچار ہیں۔ ملک میں جب بھی کوئی بحران آتا ہے تو یہ سب لوگ ترک وطن کر کے دیار غیر میں جا بستے ہیں۔ جن لوگوں سے یہ ووٹ لے کر پارلیمنٹ کے منتخب ارکان بنتے ہیں انھیں ہی برے وقت میں تنہا چھوڑ جاتے ہیں۔ وطن عزیز کے معرض وجود میں آنے کے دن سے لے کر آج تک اس ملک میں جب جب کوئی بحران آیا ہے قربانیاں صرف غریب عوام نے ہی دی ہیں۔مالی مشکلات پیدا کرنے کے اصل ذمے دار یہی لوگ ہیں جب کہ قربانیاں عوام سے مانگی جاتی ہیں۔ ٹیکسوں کی بھرمار اور اشیائے خورونوش کی گرانی عوام کو برداشت کرنا پڑتی ہے۔ IMF کی کڑی شرطوں کا سارا بوجھ عوام پر ڈالا جاتا ہے اور عالمی مالی ادارے جب کوئی قرضہ منظور کر دیتے ہیں تو شاہانہ خرچ اِنہی خیر خواہوں کے شروع ہو جاتے ہیں۔ 

ہماری سمجھ میں نہیں آرہا کہ ارکان پارلیمنٹ اور حکومتی اہل کاروں کی تنخواہوں میں یکمشت اتنا بڑا اضافہ کرنے کی بھلا ایسی کیا بڑی ضرورت آن پڑی تھی کہ پچاس فیصد نہیں سو فیصد نہیں چار سو سے لے کر نو سو فیصدی تک ایک ہی چھلانگ میں بڑھا دی گئی ہیں۔ جب کہ ان بھاری تنخواہوں کے علاوہ دیگر مراعات اور بھی دی جارہی ہیں۔ ان کے گھر کے اخراجات بھی حکومت کے خزانوں سے پورے کیے جاتے ہیں۔ بجلی، گیس اور ٹیلیفون تک کے بلوں کی ادائیگی عوام کے پیسوں سے کی جاتی ہے۔ پارلیمنٹ کے اجلاسوں میں حاضری لگانے کے الاؤنس بھی اس کے علاوہ ملتے ہیں۔ پارلیمنٹ کی کیفے ٹیریا میں انھیں لنچ اور ڈنر بھی بہت ہی ارزاں داموں میں ملا کرتے ہیں۔ اِنکے سفری اخراجات بھی عوام کے ٹیکسوں سے پورے کیے جاتے ہیں، پھر کیا وجہ ہے کہ انھیں اتنی بڑی بڑی تنخواہوں سے نوازا گیا ہے۔ IMF نے ابھی صرف ایک ملین ڈالر ہی دیے ہیں اور ہمارے مسیحاؤں نے فوراً ہی اس میں سے اپنا حصہ سمیٹ لیا ہے، مگر جب یہ قرض ادا کرنے کی بات ہو گی تو عوام سے وصول کیا جائے گا۔

حکومت نے تو یہ کام کر کے اپنے ساتھیوں کی دلجوئی کر دی ہے مگر ہمیں یہ توقع نہ تھی کہ اپوزیشن کے ارکان اس کی اس حرکت پر خاموش رہیںگے۔ پاکستان تحریک انصاف جو ہر حکومتی کام پر زبردست تنقید کرتی دکھائی دیتی ہے اس معاملے میں مکمل خاموشی طاری کیے ہوئے ہے۔ اس بہتی گنگا میں اس نے بھی اشنان کرنے میں بڑی راحت محسوس کی ہے اور مال غنیمت سمجھ کر جو آتا ہے ہنسی خوشی قبول کر لیا ہے۔ یہاں اسے اپنے غریب عوام کا ذرہ بھر بھی خیال نہیں آیا۔ کوئی منحنی سی آواز بھی پارلیمنٹ میں بلند نہیں کی۔ غریب عوام کو ابھی تک اس حکومت سے کوئی بڑا ریلیف نہیں ملا ہے۔ مہنگائی کی کمی کے جو دعوے کیے جارہے ہیں تو زمینی حقائق کے بالکل برخلاف ہیں، کسی شئے کی قیمت کم نہیں ہوئی ہے۔ جس آٹے کی قیمت کم کیے جانے کا دعویٰ کیا جا رہا ہے وہ ایک بار پھر پرانی قیمتوں کو پہنچ چکا ہے۔ عوام کی سب بڑی مشکل بجلی اورگیس کے بلز ہیں۔اس مد میں انھیں ابھی تک کوئی ریلیف نہیں ملا ہے۔ 

سردیوں میں صرف تین ماہ کے لیے جو رعایتی سیل حکومت نے لگائی ہے۔ وہ بھی حیران کن ہے کہ جتنی زیادہ بجلی خرچ کرو گے اتنا زیادہ ریلیف ملے گا۔ یعنی گزشتہ برس اِن تین سال میں عوام نے جتنی بجلی خرچ کی ہے اس سے زیادہ اگر وہ اس سال اِن تین مہینوں میں خرچ کریں گے تو حکومت اس اضافی بجلی پر کچھ ریلیف فراہم کریگی۔ سبحان اللہ سردیوں میں عام عوام ویسے ہی کم بجلی خرچ کرتے ہیں انھیں زیادہ بجلی خرچ کرنے پر اکسایا جا رہا ہے۔ یہ ریلیف بھی انھی امیروں کو ملے گا جو سردیوں میں الیکٹرک ہیٹر چلاتے ہیں۔ غریب عوام کو کچھ نہیں ملے گا۔ اس نام نہاد ریلیف کی تشہیراخبارات میں بڑے بڑے اشتہاروں کے ذریعے کی جارہی ہے جنھیں دیکھ کر عوام قطعاً خوش نہیں ہو رہے بلکہ نالاں اور سیخ پا ہو رہے ہیں ۔ خدارا عقل کے ناخن لیں اورصحیح معنوں میں عوام کو ریلیف بہم پہنچانے کی کوشش کریں۔ غیرملکی قرضوں سے انھیں نجات دیں اور کچھ دنوں کے لیے سکھ کا سانس لینے دیں۔ ابھی معیشت پوری طرح بحال بھی نہیں ہوئی ہے اور قرض کو مال مفت سمجھ کر اپنے ہی لوگوں میں تقسیم کر دیا گیا۔ اسے اس بے رحمی سے خرچ کیا جارہا ہے جیسے پھر کبھی موقع نہیں ملے گا۔ کسی بھی رکن پارلیمنٹ کا سویا ہوا ضمیراس شاہانہ اخراجات پر نہیں جاگا۔

IMF جو حکومتی ہر اقدام پر کڑی نظر رکھتی ہے وہ بھی نجانے کیوں اس غیر ضروری فراخدلی پر خاموش ہے۔ وہ دراصل چاہتی بھی یہی ہے کہ یہ ملک اور اس کے عوام اسی طرح قرض لینے کے لیے ہمیشہ اس کے محتاج بنے رہیں اور وہ چند ملین قرض دینے کے بہانے ان پر پابندیاں لگاتی رہے۔ وہ ہرگز نہیں چاہتی کہ ہم اس کے چنگل سے آزاد ہو کر خود مختار اور خود کفیل ہو پائیں۔ اس کی ہشت پالی گرفت ہمیں کبھی بھی اپنے شکنجہ سے نکلنے نہیں دے گی۔ یہ سی پیک اور معدنیات کے بڑے بڑے ذخائر سب فریب نظر ہیں۔ ہم کبھی بھی اِن سے فیضیاب نہیں ہو پائیںگے۔ ہمیں برباد کرنے کے لیے تو اُن کے پاس بہت سے آپشن ہیں۔ کبھی سیاسی افراتفری اور کبھی منتخب حکومت کی اچانک تبدیلی۔ کبھی ایران کے ساتھ تجارتی معاہدوں پر پابندیاں تو کبھی سی پیک رول بیک کرنے کی کوششیں۔ اسی طرح اور ممالک نے بھی ایسے ہی کئی MOU سائن کیے ہیں لیکن وہ بھی صرف کاغذوں پر موجود ہیں ،عملاً کوئی قدم بھی ابھی نہیں بڑھایا ہے۔ حالات جب اتنے شکستہ اور برے ہوں تو ہمیں اپنا ہاتھ بھی ہولہ رکھنا چاہیے۔ پڑوسی ملک بھارت کے زرمبادلہ کے ذخائر ہم سے کہیں زیادہ ہیں لیکن وہاں کے پارلیمنٹرین کی تنخواہیں اور مراعات ہم سے بہت ہی کم ہیں۔ یہی سوچ کر ہمارے حکمرانوں کو احساس کرنا چاہیے کہ ہم کیونکر اتنے شاہانہ خرچ کے مرتکب ہو رہے ہیں۔

ڈاکٹر منصور نورانی

پاکستانی عوام مہنگائی اور مشکلات کی جس چکی سے گزر رہے ہیں، وہ کسی سے چھپی ہوئی نہیں، افسوسناک پہلو یہ ہے کہ ان مسائل کو حل کرنے میں کسی بھی قسم کی خاطر خواہ پیش رفت نظر نہیں آتی۔ پاکستان کی معیشت اور عوام کی مشکلات کی ویسے تو کئی وجوہات ہیں جن میں گڈ گورننس کی کمی، ترقیاتی ہدف کی جانب نیک نیتی سے پیش قدمی کا نہ ہونا، سیاسی ماحول میں تسلسل سے کھنچاؤ لیکن معاشی اعتبار سے ان سب کی جڑ دو اہم مسئلوں میں الجھی ہوئی ہے۔ ان دونوں مسئلوں کا قابل عمل حل جب تک تلاش نہ کیا جائے گا نہ تو ملکی معیشت میں استحکام پیدا ہو گا اور نہ ہی عام آدمی کی زندگی فلاح و بہبود کی جانب بڑھ سکے گی اور یہ دو معاملات ہیں پاکستان پر بڑھتے ہوئے قرضوں کا بوجھ اور بجلی کی مد میں کپیسٹی چارجز کی رقم، ان دونوں مسئلوں نے پاکستانی معیشت اور عوام کو جکڑ کر رکھ دیا ہے۔ آئیے ذرا ان کا جائزہ لیتے ہیں کہ پاکستان اس حوالے سے کس مشکل میں گرفتار ہیں۔ ایک اندازے کے مطابق پاکستان نے اس مالی سال کے دوران 40 ارب ڈالر کا قرض واپس کرنا ہے۔ اس ادائیگی میں قرض کی اصل رقم تو صرف آٹھ بلین ڈالر ہو گی جب کہ باقی 32 ارب ڈالر سود کی مد میں ادا کرنے ہوں گے۔ پاکستان کے پاس آمدنی ہو یا نہ ہو اسے ہر حال میں 32 بلین ڈالر تو ادا کرنے ہی ہوں گے۔ بات یہاں ہی ختم نہیں ہوتی بلکہ ناعاقبت اندیشانہ پالیسیوں کے نتیجے میں ہر سال ایک خطیر رقم قرض پر دیے جانے والے سود کی مد میں مسلسل بڑھ رہی ہے۔

ادھر آئی پی پی سے پیدا ہونے والی بجلی کے مد میں ہمیں ساڑھے سات بلین ڈالر کپیسٹی پیمنٹ کے طور پر دینے ہیں۔ سالہا سال گزر جانے کے باوجود حکمرانوں کے پاس اس سے نکلنے کے لیے نہ تو کوئی پالیسی ہے اور نہ ہی ان معاملات کو حل کرنے کا عزم نظر آ رہا ہے۔ ہم کبھی سعودی عرب کی طرف دیکھتے ہیں اور کبھی چین کی طرف، کبھی متحدہ عرب امارات کی طرف دیکھتے ہیں کہ وہ کوئی مدد دے دیں۔ اس صورتحال کے ذمے دار کون ہیں۔ ہم پر کتنا قرضہ ہے اور یہ کس طرح چڑھا ہے اور اس گرداب سے نکلنے کے لیے ہمیں کیا کرنا ہے۔ اس بار یہ توقع کی جا رہی تھی کہ شاید حکومت اور مقتدر قوتی ایسے اصلاحی اقدامات کریں جس سے ہم خیر کی راہ پر چل نکلیں۔ لیکن بدقسمتی سے وہی “ڈھاک کے تین پات” … افسوس کہ “کارواں کے دل سے احساس زیاں جاتا رہا” ۔ معاشی ماہرین اور پاکستان کی سیاسی تاریخ پر نظر رکھنے والے تجزیہ نگاروں کی اکثریت اس بات پر متفق ہے کہ اشرافیہ عوام کو ہر ایشو پر دھوکے میں رکھ رہی ہے۔ 

حکومت سہانے خواب دکھاتی ہے کہ 10 بلین ڈالر فلاں جگہ سے آ رہے ہیں۔ 15 ملین ایک بین الاقوامی ادارہ امداد کے طور پر دے رہا ہے اور جب یہ رقوم آجائیں گی تو ہم خسارے پر بھی قابو پا لیں گے، کپیسٹی چارجزکا مسئلہ بھی حل کر لیں گے، سود کی قسط بھی ادا کر دیں گے اور ترقیاتی منصوبوں کے لیے بھی رقم مہیا کر سکیں گے۔ یہ سب کچھ بالکل اسی طرح ہے کہ کبوتر بلی کو دیکھ کر آنکھیں بند کر لے اور سوچے کہ میں اب محفوظ ہو گیا ہوں۔ حقیقت یہ ہے کہ یہ سب کچھ ایک خواب دکھانے کے مترادف ہے۔ حکمران اور سیاست دانوں کی نیتیں ٹھیک نہیں ہیں۔ وہ اصل مسئلے کو حل کرنے میں سنجیدہ نہیں ہیں، صرف ڈنگ ٹپاؤ کام ہو رہا ہے۔ ملک کی معاشی اور معاشرتی صورتحال ایک پیچیدہ اور گنجلک جال بن چکا ہے۔ اس کا سرا نہ تو کوئی نیک نیتی سے پکڑنا چاہ رہا ہے اور نہ ہی کسی کو فکر ہے۔ اس ملک کے حکمران اپنی آنکھیں اور دماغ کیوں نہیں کھول رہے۔ پاکستان کی نسبت کم تر وسائل رکھنے والے ملک اور مشکلات سے گھری قوموں نے بھی منزل کو جانے والا راستہ ڈھونڈ نکالا ہے لیکن ایک ہم ہیں جو اپنی ہی صورت کو بگاڑنے پر لگے ہوئے ہیں۔ ہمارے پاس من حیث القوم وقت نہ ہونے کے برابر ہے۔ ہمیں نعرے بازی اور بیانیے کی جنگ کو چھوڑ کرملک اور قوم کی تعمیر کے لیے لائحہ عمل تشکیل دینا ہے۔ پاکستانی عوام کے دکھ درد کا مداوا کب ہو گا؟ اور کون کرے گا؟… یہ ہے وہ سوال جو پاکستان کے عوام حکمرانوں سے پوچھ رہے ہیں۔

سرور منیر راؤ  

پاکستان کو سود اس تیزی سے کھا رہا ہے کہ اب تو ہمارے بجٹ کا بڑا حصہ سود کی ادائیگی میں چلا جاتا ہے۔ سود کی مد میں مالی سال 2023-2024 میں 7300 ارب روپے مختص کیے گئے تھے لیکن کہا جا رہا ہے کہ سود کی ادائیگی اس سال کوئی 8300 ارب روپے سے بھی زیادہ ہو گی جبکہ آئندہ سال سود کی ادائیگی کیلئے مختص تخمینہ کوئی 9500 ارب روپے کے لگ بھگ ہے۔ ہمارے قرضے (جن میں بہت بڑا حصہ اندرونی قرضوں کا ہے) اتنے بڑھ چکے ہیں اور بڑھتے جا رہے ہیں کہ اگر کوئی حل نہ نکالا گیا تو پاکستان اپنا بجٹ بھی نہیں بنا سکے گا کہ سارے کا سارا بجٹ ہی سود کی ادائیگی پر خرچ ہو جائے تو پھر ملک کیسے چل سکتا ہے؟؟ کچھ عرصہ قبل مجھے ایک صاحب ملنے آئے جن کا نام قانت خلیل اللہ ہے۔ وہ ایک چارٹرڈ اکائونٹنٹ ہیں اور کچھ اہم اداروں سے منسلک رہے ہیں۔ اُن کا کہنا تھا کہ پاکستان کے اندرونی قرضے فوری طور پر ختم ہو سکتے ہیں جس سے سود کا بوجھ ختم ہو جائے گا۔ قانت صاحب نے دی نیوز میں اس سلسلے میں تین آرٹیکل بھی لکھے جبکہ وہ مختلف فورمز پر جا کر اپنی تجویز بھی سب کے سامنے رکھ رہے ہیں۔

میں نے وزیراعظم شہباز شریف صاحب سے بھی درخواست کی تھی کہ اپنی معاشی ٹیم کو کہیں کہ قانت صاحب کو سنیں اور اگر اُن کی تجویز میں کوئی وزن ہے تو اُس پر سنجیدگی سے غور کر کے پاکستان کو سود کے اس سنگین خطرے اور گناہ کبیرہ سے بچائیں۔ ابھی تک تو قانت صاحب سے حکومت کی طرف سے تو کوئی رابطہ نہیں کیا گیا لیکن میں نے اُن سے درخواست کی کہ مجھے اردو زبان میں قرضوں اور سود کے اس بوجھ کو ختم کرنے کیلئے اپنی تجویز لکھ کر بھیجیں تاکہ میں اُسے اپنے کالم میں شائع کر سکوں۔ ان کی تجویزدرج ذیل ہے: ’’جدید بینکنگ نظام میں دو قسم کی کرنسی یا پیسے ہوتے ہیں: بینک نوٹ (جو مرکزی بینک جاری کرتا ہے) اور بینک ڈپازٹ، جو کمرشل بینکوں کے قرضے ہوتے ہیں۔ عمومی نقطہ نظر سے، بینک ڈپازٹس نقد رقم رکھنے کے برابر ہیں۔ بینک جب قرضے جاری کرتے ہیں، نئے روپے تخلیق کرتے ہیں، کیونکہ اسی وقت بینک اکاؤنٹس میں نمبر (بینک ڈپازٹس) ظاہر ہوتے ہیں۔

بینک آف انگلینڈ کے الفاظ میں: ’’جب ایک بینک قرض دیتا ہے، اسی لمحے، نیا پیسہ تخلیق ہوتا ہے۔ مثال کے طور پر، کسی کو گھر خریدنے کیلئے قرض دینے والے کو بینک ہزاروں پاؤنڈ مالیت کے نوٹ نہیں دیتا۔ اس کے بجائے، وہ ان کے بینک اکاؤنٹ میں قرض کے برابر بینک ڈپازٹ کریڈٹ کرتا ہے۔‘‘ (بینک آف انگلینڈ سہ ماہی بلیٹن، 2014 Q1) زیادہ سے زیادہ منافع کمانے کیلئے، تجارتی بینکس زیادہ قرضے جاری کرنے کی کوشش کرتے ہیں۔ فریکشنل ریزرو سسٹم کے تحت صرف 6-5 فیصد مرکزی بینک کی ریزرو کرنسی کے ساتھ، بینک قرضے جاری کر سکتے ہیں اور تقریباً بیس گنا تک بینک ڈپازٹ میں اضافہ کر سکتے ہیں۔ تاہم، ان کے پیسہ کی توسیع سے ہونیوالی افراط زر یا مہنگائی کو مرکزی بینک بلند شرح سود کی پالیسی کے ذریعے کنٹرول کرنے کی کوشش کرتا ہے تاکہ قرض لینے کی سرگرمی کی حوصلہ شکنی کی جا سکے۔ تاہم جیسا کہ اوپر ذکر کیا گیا ہے، پاکستان میں بلند شرح سود پالیسی مؤثر نہیں ہے کیونکہ تجارتی بینکوں کی سب سے بڑی قرض دار حکومت پاکستان خود ہی ہے، جو قرضے واپس کرنے کی پوزیشن میں نہیں ہے۔ 

دلچسپ بات یہ ہے کہ پیسے کی تخلیق کے قانونی اختیارات کے باوجود، پاکستان کی ریاست نجی بینکوں سے بڑے پیمانے پہ اور قرضے لے رہی ہے تاکہ پرانے قرضوں پر سود ادا کر سکے۔ یہ ایک مسلسل عمل ہے؛ حکومت سود کی ادائیگی کیلئے قرض لیتی ہے، جس سے حکومت کا قرض بڑھتا ہے، اور سود کی ادائیگی کے نتیجے میں بینک ڈیپازٹس میں اضافہ ہوتا ہے۔ ہم پیسے کی فراہمی میں اضافے کی وجہ سے افراط زر کا سامنا کر رہے ہیں، اور ہمارے بچوں پر حکومتی قرض کا بوجھ مسلسل بڑھتا چلا جائے گا۔ پاکستان کے سنگین معاشی مسائل کا حل مکمل ریزرو بینکنگ کا نفاذ ہے۔ اس نظام کی تائید بیسویں صدی کے بڑے ماہرین معاشیات ، جن میں ملٹن فریڈ مین اور فشر نمایاں ہیں، نے کی ہے اور اس کے نفاذ کو نہایت ہی قابل عمل اور آسان بتایا ہے۔ یہ منظم مالیاتی نظام بھاری سرکاری قرضوں کے بوجھ اور ان پر سود کے اخراجات کو ختم کرنے کی پوری صلاحیت رکھتا ہے۔ یہ منصوبہ مالیاتی استحکام کو یقینی بنانے، افراط زر کو کنٹرول کرنے اور اقتصادی خوشحالی کو فروغ دینے کے مقاصد کو حاصل کر سکتا ہے۔ فریکشنل ریزرو سسٹم، جو پیسے کی فراہمی میں اتار چڑھاؤ اور اقتصادی عدم استحکام کا ذمہ دار ہے، اس کو مکمل ریزرو سسٹم سے تبدیل کیا جا سکتا ہے۔ نیا تجویز کردہ نظام درج ذیل بنیادی اصولوں پر کام کرے گا:

۱۔ تجارتی بینکس قرض جاری کرنے اور انویسٹمنٹ کرنے کے عمل میں نیا پیسہ /کرنسی تخلیق نہیں کرسکیں گے۔ ۲۔ پیسہ تخلیق کرنے کی صلاحیت ایک خود مختار ادارے جیسے اسٹیٹ بینک کو منتقل کی جائے گی جو جی ڈی پی میں اضافے کے برابر نیا پیسہ تخلیق کر یگا تاکہ مہنگائی یا افراط زر نہ ہو۔ ۳۔ نیا تخلیق کردہ پیسہ غریب طبقے کی بنیادی ضروریات اور انفراسٹرکچر کی تعمیر کیلئے استعمال کیا جائے گا تاکہ اشیا کی طلب کے ساتھ سپلائی میں بھی موثر اضافہ ہو۔

سو فیصد (100%) ریزرو سسٹم میں، بینکوں کو پابند کیا جائے گا کہ وہ اپنے تمام ڈپازٹس کیلئے 5 فیصد کی جگہ 100 فیصد تک مرکزی بینک کی ریزرو کرنسی رکھیں۔ نتیجتاً، بینک کے قرضوں سے نیا پیسہ تخلیق کرنے کا عمل بند ہو جائے گا، اس کے بجائے، بینکوں کو قرضے جاری کرنے کیلئے پہلے سرمایہ حاصل کرنے کی ضرورت ہو گی، اس سے پیسے کی فراہمی میں بڑے پیمانے پر اتار چڑھاؤ کو روکا جاسکے گا۔ مزید یہ کہ بینکوں کو مرکزی بینک کی ریزرو کرنسی کو حاصل کرنے کیلئے حکومتی بانڈز اور ٹریژری بلز اسٹیٹ بینک کے حوالے کرنا ہوں گے، اور کیونکہ 100 فیصد ریزرو کرنسی کی مقدار بینکوں کے پاس تقریباً 60 فیصد حکومتی بانڈز سے زیادہ ہے اسلئے اس سے بینکوں کے علاوہ دوسرے اداروں اور لوگوں کے ہاتھوں میں حکومتی بانڈز اور قرضہ بھی ادا کر دیئے جائیں گے اور اس طرح پاکستان کا پورا داخلی قرض ختم ہو سکے گا۔ یہ نیا نظام اسلام کے مقاصد اور مالیاتی اصولوں کے عین مطابق ہے۔

سب سے اہم بات یہ ہے کہ موجودہ نظام کے مقابلے میں جہاں 90 فیصد سے زیادہ کرنسی، تجارتی بینکس قرض دیتے وقت تخلیق کر رہے ہیں اور کرنسی اور قرض ایک ہی سکے کے دو رخ ہیں، اس نئے نظام میں پیسہ قرض کے بغیر تخلیق کیا جائیگا اور یہ حقیقی اشیا کی پیداوار کے تناسب سے ہو گا۔ مزید یہ کہ موجودہ بینکنگ سسٹم کے برعکس، ڈیپازٹ ہولڈرز کو انویسٹمنٹ اور نفع نقصان میں شرکت کے بغیر کوئی منافع نہیں ملے گا، ان کو اپنی رقم بینکوں کو ٹرانسفر کرنا ہو گی جو اس رقم کو مختلف کاروباری اداروں میں انویسٹ کر کے منافع کمائیں گے اور تقسیم کریں گے۔ روپے کی قدر اس نظام میں مستحکم رہے گی کیونکہ تجارتی بینک قرض کے ساتھ روپے کی سپلائی نہیں بڑھا رہے ہوں گے۔ اس نئے نظام میں حکومت کا 6 ہزار ارب کا سودی خرچ ختم ہو جائے گا اور اسکے پاس ٹیکس کے علاوہ تقریباً 2 ہزار ارب کی نئی تخلیق کردہ کرنسی ہو گی، اسلئے حکومت کو اپنی مالی ضروریات پوری کرنے کیلئے بینکوں سے قرض لینے کی ضرورت نہیں پڑے گی، جس سے افراط زر کے نتیجے میں ہونے والی مہنگائی ختم ہو جائے گی۔ 

حکومت اپنی مالیاتی پالیسیوں کو مؤثر طریقے سے نافذ کر سکے گی، اور سود کی ادائیگی کیلئے رکھی گئی رقم، سماجی اور اقتصادی ترقی کے منصوبوں میں استعمال ہو سکے گی۔ مجموعی طور پر، 100%ریزرو بینکنگ ایک جدید اور پائیدار حل پیش کرتی ہے جو پاکستان کے سنگین اقتصادی مسائل کو حل کر سکتی ہے، مالیاتی استحکام کو یقینی بنا سکتی ہے، اور پاکستان اور اس کے عوام کیلئے ایک خوشحال مستقبل کی بنیاد رکھ سکتی ہے۔‘‘

انصار عباسی 

پاکستان اپنے قیام سے ہی غیر ملکی قرضوں پر بہت زیادہ انحصار کرتا آ رہا ہے۔ اس رجحان میں گزشتہ چند سالوں کے دوران خطرناک حد تک اضافہ ہوا ہے۔ اس وقت پاکستان کے قرضوں کا حجم مجموعی قومی پیداوار کے 90 فیصد تک پہنچ چکا ہے جو کہ مالیاتی رسک اور قرض کی حد بندی ایکٹ 2005ء کی مقرر کردہ 60 فیصد حد سے بھی زیادہ ہے۔ بیرونی قرضوں کے حجم میں اضافے کی وجہ سے گزشتہ بیس سال کے دوران قومی ترقیاتی اخراجات کا حجم 20 فیصد سے کم ہو کر 12 فیصد پر آ گیا ہے جس کی وجہ سے صحت اور تعلیم جیسے اہم شعبوں پر حکومتی سرمایہ کاری مسلسل کم ہو رہی ہے۔ اس طرح یہ کہا جا سکتا ہے کہ ماضی میں ترقی کی شرح میں اضافے کیلئے قرض لینے کی پالیسی کے قومی معیشت پر مثبت اثرات مرتب نہیں ہوئے۔ تاہم یہ بھی حقیقت ہے کہ بیرونی قرضے پاکستان جیسے ترقی پذیر ممالک کو تجارتی خسارے کو سنبھالنے اور اہم شعبوں کو فنڈ دینے کیلئے مالی معاونت کا بنیادی ذریعہ ہیں۔ اس صورتحال میں نئی حکومت کیلئے جاری معاشی بحران سے نمٹنے کیلئے ضروری ہے کہ وہ مختلف ترقیاتی اشاریوں اور جمع شدہ غیر ملکی قرضوں کے درمیان روابط کا باریک بینی سے تجزیہ کرے۔

اس طرح کی جانچ پڑتال ملک کے معاشی بحرانوں سے نمٹنے اور پائیدار ترقی کو یقینی بنانے کیلئے موثر حکمت عملی وضع کرنے کیلئے ضروری ہے۔ ہمارے لئے یہ موازنہ اس لئے بھی ضروری ہے کہ پاکستان کی معیشت اس وقت جس معاشی بحران سے دوچار ہے اس کی بڑی وجہ بیرونی قرضوں کا بڑھتا ہوا حجم ہے جو معاشی استحکام کیلئے خطرہ بن چکا ہے۔ قومی معیشت پر بیرونی قرضوں کے بوجھ کی ایک بڑی وجہ پاکستان کی آبادی میں ہونے والا تیز رفتار اضافہ بھی ہے۔ اس خطرے کا اندازہ اس بات سے لگایا جا سکتا ہے کہ آبادی کے حجم کے لحاظ سے پاکستان دنیا کا پانچواں بڑا ملک ہے جبکہ معاشی لحاظ سے پاکستان دنیا میں 46ویں نمبر پر ہے۔ اس کے برعکس امریکہ، چین اور بھارت ناصرف آبادی کے اعتبارسے دنیا کے تین بڑے ممالک ہیں بلکہ معاشی لحاظ سے بھی وہ دنیا کی بڑی معاشی طاقتیں ہیں۔ یہ حالات معاشی اور مالیاتی نظم و نسق میں خامیوں کی نشاندہی کرتے ہیں۔ واضح رہے کہ دیگر ترقی پذیر ممالک بھی بیرونی قرضوں کو مالیاتی خسارہ پورا کرنے اور ترقیاتی منصوبوں کو فنڈ دینے کیلئے استعمال کرتے رہے ہیں۔ یہ قرضے براہ راست اور بالواسطہ طور پر تجارت، افراط زر، شرح مبادلہ، کھپت، سرمایہ کاری، جی ڈی پی کی نمو اور قرضوں کی ادائیگی جیسے معاشی عوامل پر اثر انداز ہوتے ہیں۔

اس وقت پاکستان جس معاشی بدحالی کے دہانے پر کھڑا ہے اس کا تقاضا ہے کہ بیرونی قرضوں پر انحصار کم کر کے فنڈنگ کے ذرائع کو متنوع بنا کرپائیدار ترقی کو فروغ دینے اور قرض کے انتظام کی صلاحیت کو بہتر بنانے پر کام کیا جائے۔ علاوہ ازیں کرنسی کی قدر میں کمی، افراط زر، سیاسی عدم استحکام اور متضاد اقتصادی پالیسیوں جیسے عوامل کو بھی بہتر بنانے کی ضرورت ہے۔ اس حوالے سے حکومت کو غیر ملکی قرضوں پر کم انحصار کو ترجیح دیتے ہوئے طویل مدتی قرض کے انتظام کی ایک جامع حکمت عملی وضع کرنی چاہئے۔ یہ حکمت عملی موجودہ قرضوں کی ادائیگی، نئے قرضوں کے جمع ہونے کو روکنے اور فنڈنگ کے ذرائع کو متنوع بنانے پر مشتمل ہونی چاہئے۔ قرض لینے کی لاگت کو کم کر کے، قرض کی پائیداری کو بڑھا کر، سرمایہ کاروں کے اعتماد و شفافیت کو فروغ دے کر اور اقتصادی ترقی کو سہارا دے کربیرونی قرضوں کو لاحق خطرات کو کم کیا جا سکتا ہے۔ اس کے لئے آئی ایم ایف اور ورلڈ بینک جیسے روایتی عالمی مالیاتی اداروں سے ہٹ کر غیر ملکی سرمایہ کاری کو راغب کرنا، بین الاقوامی منڈیوں میں بانڈز جاری کرنا، مالی امداد کے متبادل راستے تلاش کرنا مخصوص قرض دہندگان پر انحصار کم کر سکتا ہے۔

چین، بھارت اور جنوبی افریقہ جیسے ممالک فنڈنگ کے ذرائع کو متنوع بنا کر عالمی مالیاتی اداروں کے قرضوں سےنجات حاصل کر چکے ہیں۔ علاوہ ازیں چین کی جانب سے مختلف کرنسیوں میں قرض کے اجراء نے کرنسی کے اتار چڑھاو کے اندیشے کو کم کیا ہے اور سرمایہ کاروں کی منڈیوں کو وسیع کیا ہے۔ ہندوستان کی طرف سے مختلف کرنسیوں میں بانڈز جاری کرنے سے قرض لینے کی لاگت کم ہوئی ہے۔ جنوبی افریقہ کی جانب سے سکوک بانڈز کے اجراء نے اپنے سرمایہ کاروں کی بنیاد کو متنوع بنانے کے لیے اسلامی مالیاتی اصولوں کی تعمیل کرتے ہوئے فنڈنگ کے نئے ذرائع کی اہمیت کو اجاگر کیا ہے۔ بیرونی قرضوں پر معاشی انحصار کم کرنے کے لیے طویل المدت بنیادوں پر ادارہ جاتی اصلاحات کی بھی اشد ضرورت ہے۔ ایسا کرنے میں ناکامی مستقبل کی نسلوں کو بیرونی قرضوں کے بوجھ تلے مزید دبانے کے مترادف ہو گی جسے کسی طرح بھی قومی مفاد میں قرار نہیں دیا جا سکتا ہے۔ اس سلسلے میں ادارہ جاتی اصلاحات کے علاوہ غیر ملکی سرمایہ کاری کو راغب کر کے اور برآمدات پر مبنی صنعتوں کو فروغ دے کر قرضوں کے بوجھ کو کم کرنے میں کامیابی حاصل کی جا سکتی ہے۔ علاوہ ازیں سرکاری عملے کی تربیت اور ٹیکنالوجی میں سرمایہ کاری کے ذریعے بیرونی قرضوں کے استعمال میں شفافیت کو یقینی بنایا جا سکتا ہے۔ ہمیں یہ بات یاد رکھنی چاہئے کہ پاکستان کی خوشحالی کا راستہ پیداواری صلاحیت اور برآمدات میں اضافے، توانائی کی لاگت کو کم کرنے اور زراعت میں سرمایہ کاری کرنے میں مضمر ہے۔

کاشف اشفاق